بغداد : عراق میں مقامی میڈیا نے چہارشنبہ کے روز موصل شہر میں ایک پرائمری اسکول کی طالبہ کی موت کی خبر نشر کی تھی۔ طالبہ کو اس کی استانی حجاب نہ پہننے پر نکال دیا تھا۔ اس خبر نے ملک بھر میں غم و غصے کی لہر دوڑا دی ہے۔عراقی وزارت داخلہ کی جانب سے جاری بیان میں 12 سالہ لڑکی سما کی وفات پر افسوس کا اظہار کرتے ہوئے طالبہ کی موت کی تحقیقات شروع کرنے کا اعلان کیا ہے۔ رپورٹ کے مطابق حجاب نہ پہننے کے سبب اس طالبہ کو امتحان دینے کے لیے کلاس میں داخلے کی اجازت نہ دی گئی۔دوسری جانب نینوی صوبے کی پولیس کا کہنا ہے کہ ابتدائی تحقیقات سے یہ بات سامنے آئی ہے کہ مذکورہ طالبہ کو امتحان سے باہر نہیں نکالا گیا تھا بلکہ وہ وقت سے قبل یعنی صبح 8بجے خود اسکول سے باہر چلی گئی۔
