اورنگ آباد 19 اپریل (سیاست ڈاٹ کام ) کوویڈ 19کے پھیلاو کو روکنے کیلئے اپنی جانوں کی پرواہ کیے بغیر دن رات عوام کی خدمت کرنے والے ایمرجنسی خدمات سے وابستہ ملازمین کی کوششوں اور اُنکی قابلِ قدر و لائق تحسین خدمات کو سراہنے کی ضرورت پر زور دیتے ہوئے انھیں بطور اعتراف خدمت ایک ماہ کی اضافی تنخواہ دئے جا نے کا مطالبہ کل جماعتی وفاق ‘ مسلم نمائندہ کونسل’ کی جانب سے کیا گیا ہے ۔ مہاراشٹرا کے وزیر اعلیٰ ادھو ٹھاکرے کو علاقائی کمشنر کے توسط سے دیئے گئے ایک محضر میں جس پر مسلم نمائندہ کونسل کے صدر ضیا ء الدین صدیقی کے علاوہ عبدالمنان خان، محمد کامران علی اور محمد منتجیب الدین کے دستخط ہیں یہ مطالبہ کیا گیا ہے ۔ محضر میں کہا گیا ہے کہ ایسے نازک حالات میں اپنی اور اپنے خاندان کے جانوں کی پرواہ کیے بغیر اپنی خدمات کو بروقت اور بخوبی نبھانے والے ملازمین جن کا تعلق شعبہ طب، پولس اور دیگر حفظان صحت سے تعلق رکھنے والے محکموں سے ہے ، انھیں خراج تحسین پیش کیا جانا چاہئے اور انکی اس خصوصی نوعیت کی خدمات کے اعتراف میں انھیں ایک ماہ کی اضافی تنخواہ دی جانی چایئے ۔
