فریج بھی گھر کے فرد کی طرح ہوتا ہے، اس کا بھی ایسے ہی خیال رکھنا چاہئے جیسے ہم گھر کے افراد کا رکھتے ہیں۔یہ بیمار تو نہیں ہوتا لیکن اسے بھی صفائی کی ضرورت ہوتی ہے، جو ہر مہینے کی جائے تو بہتر ہے، ورنہ ہر دو ماہ بعد لازمی کرنی چاہیے۔گھر کے ہر فرد کا فریج سے روزانہ کئی بار واسطہ پڑتا ہے۔اسی لئے گھریلو استعمال کی اس اہم ترین چیز کے لئے مناسب صفائی اور دیکھ بھال کی اشد ضرورت ہوتی ہے۔ فریج کی صفائی کیسے کی جائے: فریج کی صفائی کیلئے سب سے پہلے تو اس کا مین سوئچ بند کرنا نہ بھولیں اور پھر اس کے دروازے مکمل کھول دیں۔فریج کی صفائی کا کام 30 تا 45 منٹ میں مکمل کر لینا چاہیے تاکہ ضروری اشیاء کی اثر پذیری برقرار رکھتے ہوئے انہیں دوبارہ فریج میں رکھا جا سکے۔ باہر نکالی گئی چیزوں کو چھانٹ لیں، جو آپ کے استعمال میں نہ ہوں، انہیں باہر ہی رکھ دیں۔ فریج میں رکھنے والی چیزوں کو اچھی طرح صاف کر لیں۔فریج کے شیلف احتیاط سے نکالیں اور انہیں سوڈا ملے محلول سے اچھی طرح دھو لیں۔اپنے ہاتھوں میں پلاسٹک کے دستانے پہن کر کپڑے کی مدد سے فریج کے اندر کی صفائی کریں۔اگر شیلف پر دھبے موجود ہیں تو انہیں صاف کرنے کے لئے گرم پانی استعمال نہ کریں اور نہ ہی انہیں کھرچیں۔ شیلف، ریکس اور درازوں کو اچھی طرح دھونے کے بعد دھوپ میں خشک کر لیں۔ جب یہ اچھی طرح خشک ہو جائیں تو انہیں واپس فریج میں لگا دیں۔فریج کے اندر کی صفائی صابن یا کسی کیمیائی مادے سے ہر گز نہ کریں کیونکہ جب آپ اس میں پھل رکھیں گی تو یہ پھل ان کیمیائی مادوں اور صابن کی بُو کو اپنے اندر جذب کر لیں گے۔فریج کی صفائی کے لئے گھریلو نسخہ استعمال کریں، مثلاً 2 بڑے چمچ بیکنگ سوڈا لے کر ایک تہائی نیم گرم پانی میں ملا لیں یا تین حصہ نیم گرم پانی میں ایک حصہ سیب کا سرکہ ملا لیں۔ فریج کے دروازے کے باہری اور اندرونی حصے کی صفائی لازمی کریں کیونکہ اسی کو سب سے زیادہ چْھوا جاتا ہے، جس کے سبب یہ جگہ جراثیم کی آماجگاہ بن جاتی ہے۔دروازے میں ایک ربڑ کی پٹی لگی ہوتی ہے، جو آسانی سے نکالی جا سکتی ہے۔اس پٹی کو نکال کر اس کی صفائی کریں۔جب یہ پٹی سیاہ ہو جائے تو سمجھ لیں کہ یہ کیڑوں اور جراثیم کا مسکن بن چکی ہے، ایسے میں اس کی صفائی ناگزیر ہو جاتی ہے۔اگر اس پٹی کی صفائی نہ کی جائے تو پھر اندر رکھی گئی اشیاء کو نقصان پہنچ سکتا ہے۔فریج سے نکالی گئی اشیاء جو باہر رکھے خشک ہو جاتی ہیں، انہیں صاف کپڑے سے خشک کر لیں اور ریکس کی صفائی کے بعد واپس فریج میں رکھ دیں۔
