غزہ : غزہ میں اسرائیلی حملوں میں شہداء کی تعداد 12 ہزار سے زائد ہو گئی۔ غیر ملکی میڈیا کے مطابق اسرائیلی حملوں میں زخمیوں کی تعداد 30 ہزار سے بھی زیادہ ہے۔ غیر ملکی میڈیا کے مطابق 7 اکتوبر سے جاری اسرائیلی حملوں میں 5 ہزار بچے اور 3300 خواتین شہید ہوئیں جبکہ 1800 بچوں سمیت تقریباً 4 ہزار فلسطینی لاپتہ ہیں اور کئی کے ملبے تلے دبے ہونے کا خدشہ ہے۔ رپورٹس کے مطابق غزہ میں شمال کے کئی علاقوں میں اسرائیلی طیاروں نے اسکول، ہاسپٹل اور رہائشی عمارتوں پر بے دریغ بمباری کی ہے۔ غیر ملکی میڈیا کے مطابق شمالی غزہ کی پٹی میں انڈونیشیا کے ہاسپٹل کے آس پاس، صابرہ کے علاقہ اور اقوامِ متحدہ کے زیر انتظام الفلاح اسکول پر بھی بم باری کی گئی جس کے نتیجے میں کئی افراد شہید اور درجنوں زخمی ہو گئے۔ رپورٹس کے مطابق الوفا ہاسپٹل پر اسرائیلی طیاروں کی بم باری سے ہاسپٹل کے ڈائریکٹر شہید اور کئی ڈاکٹر زخمی ہو گئے جبکہ القصا صیب کے علاقہ میں گھر پر بم پھینکا گیا جس سے 3 بہنیں شہید ہوئیں۔ دوسری جانب فلسطینی حکام کا کہنا ہے کہ قبل از وقت پیدا ہونے والے 4 بچے انتقال کر گئے، نوزائیدہ بچوں کو غزہ سے باہر لے جانے کا مؤثر طریقۂ کار موجود نہیں ہے۔
