واشنگٹن: امریکی ریاست فلوریڈا کے ایک کلب کے باہر مسلح شخص نے اندھا دھند فائرنگ کردی جس کے نتیجے میں 2افراد ہلاک اور20 سے زائد زخمی ہوگئے۔بین الاقوامی میڈیا کے مطابق فائرنگ کا واقعہ ریاست فلوریڈا کے شہر میامی میں بلئیر کلب کے باہر پیش آیا، سفید گاڑی میں سوار تین مسلح افراد اترے اور انہوں نے بلئیر کلب کے باہر اندھا دھند فائرنگ کردی، فائرنگ کے نتیجے میں 2 افراد ہلاک جبکہ 20 سے زائد شدید زخمی ہوئے ہیں۔عینی شاہدین کے مطابق فائرنگ اتنی شدید تھی کہ لوگوں نے لیٹ کر اپنی جانیں بچائیں، واقعہ کے بعد مسلح افراد فرار ہونے میں کامیاب ہوگئے جبکہ واقعہ کے بعد پولیس نے حملہ آروںکی تلاش شروع کردی ہے، فوری طور پر فائرنگ کی وجوہات کا علم نہیں ہوسکا ہے۔پولیس کے مطابق واقعہ کے بعد علاقے میں پولیس کی بھاری جمعیت تعینات کردی گئی ہے اور سرچ آپریشن جاری ہے جبکہ حملہ آور کی شناخت سے متعلق ابھی تک تفصیلات جاری نہیں کی گئیں ہے۔دوسری جانب پولیس کا کہنا ہے کہ گزشتہ چند ماہ کے دوران امریکہ میں فائرنگ کے واقعات میں اضافہ دیکھنے میں آیا ہے، چند روز قبل بھی مختلف ریاستوں میں فائرنگ کے واقعات میں6 سے زائد افراد ہلاک اور 4 زخمی ہوئے تھے جبکہ گزشتہ ماہ فائرنگ کے واقعات میں 18 سے زائد افراد ہلاک ہوئے تھے۔واضح رہے رواں سال مارچ میں بھی امریکی ریاستوں مین فائرنگ کے کئی بڑے واقعات رونما ہوئے تھے، جن میں اب تک 20 سے زائد افراد ہلاک اور متعدد زخمی ہوئے ۔