تلنگانہ کے تمام اضلاع میںبھی یوم آزادی تقاریب کیلئے جوش و خروش
حیدرآباد۔/14 اگسٹ، ( سیاست نیوز)73 ویں یوم آزادی کے موقع پر جمعرات 15 اگسٹ کو تلنگانہ میں بڑے پیمانے پر تقاریب منائی جائیں گی۔ حکومت تلنگانہ کے زیر اہتمام مرکزی تقریب ریاستی دارالحکومت میں واقع تاریخی قلعہ گولکنڈہ میں 10 بجے دن منعقد ہوگی جہاں چیف منسٹر کے چندر شیکھر راؤ قومی ترنگا لہرائیں گے اور عوام سے خطاب کریں گے۔ اس ضمن میں پولیس کی طرف سے سخت ترین سیکورٹی انتظامات کئے جاچکے ہیں۔ تقریب میں عوام کی آمدورفت کو آسان بنانے کیلئے ٹرانسپورٹ بسوں کا خصوصی انتظام کیا گیا ہے۔ چیف منسٹر کے سی آر نے تمام ضلع ہیڈکوارٹرس پر یوم آزادی تقاریب کے جوش و خروش کے ساتھ انعقاد کیلئے متعلقہ وزراء کو مقرر کیا ہے۔وزیر داخلہ محمد محمود علی کتہ گوڑم میں ترنگا لہرائیں گے۔ سرینواس یادوکھمم ، ایٹالہ راجندر کریم نگر ، اندرا کرن ریڈی نرمل میں پرچم کشائی کریں گے۔
یوم آزادی پر گورنر نرسمہن کی مبارکباد
حیدرآباد۔14اگسٹ (سیاست نیوز) گورنر تلنگانہ ای ایس ایل نرسمہن نے جشن آزادی کے موقع پر جاری کردہ اپنے پیغام میں تلنگانہ عوام کو مبارکباد پیش کرتے ہوئے کہا کہ آزادیٔ ہند کے لئے جن لوگوں نے بغیر کسی ذاتی مفاد کے جو قربانیاں دی ہیں اسی کے نتیجہ میں آج ہم آزاد مملکت کے باشندوں کی حیثیت سے زندگی گذار رہے ہیں۔ ای ایس ایل نرسمہن نے کہا کہ تحریک آزادی میں مجاہدین آزادی نے جو قربانیاں پیش کی ہیں ان قربانیوں کاسر بہ تسلیم خم کرتے ہوئے احترام کیا جاناچاہئے ۔انہو ںنے تمام محبان وطن کو یوم آزادی کی مبارکباد پیش کی ۔