نئی دہلی: وزیر خزانہ نرملا سیتارامن کے ذریعہ پیش کردہ بجٹ کے فنانس بل پر بحث کا آغاز کرتے ہوئے اپوزیشن اراکین نے جمعرات کو راجیہ سبھا میں لائف انشورنس اور ہیلتھ انشورنس پریمیم پر 18 فیصد جی ایس ٹی واپس لینے کا مطالبہ کیا۔جموں و کشمیر تخصیص (نمبر 3 بل) 2024، فنانس (نمبر 2 بل، 2024 اور تخصیص (نمبر 2 بل) 2024 پر مزید بحث کا آغاز کرتے ہوئے کانگریس کے وویک تنکھا نے کہا کہ ہندوستان، بنگلہ دیش، ویتنام اور انڈونیشیا سے مقابلے میں پیچھے رہ گیا ہے ۔ حکومت کمپنیوں پر ٹیکس کم کر رہی ہے جبکہ انفرادی ٹیکس دہندگان پر ٹیکس کا بوجھ بڑھا رہی ہے ۔ متوسط طبقے کو کوئی ریلیف نہیں دیا گیا ہے ۔ انہوں نے کہا کہ رئیل اسٹیٹ پر کیپیٹل گین پر ٹیکس کم کیا گیا ہے لیکن انڈیکسیشن کے خاتمے کے بعد یہ زیادہ ہو جائے گا۔ تاہم، انڈیکسیشن جزوی طور پر بحال کر دی گئی ہے جو کہ خوش آئند بات ہے ۔ اس بجٹ میں روزگار کے لیے بھی کوئی خاص انتظام نہیں کیا گیا ہے ۔ حکومت کا انٹرن شپ پروگرام بھی حوصلہ افزا نہیں ہے ۔ انہوں نے کہا کہ اس بجٹ میں تعلیم کے ساتھ صحت کے شعبے پر بھی زور نہیں دیا گیا ہے، ہر شعبہ کو نظر انداز کیا گیا ہے ۔
