حیدرآباد : عبداللہ پور میٹ پولیس نے ممنوعہ تمباکو اشیاء کی بھاری مقدار کو ضبط کرتے ہوئے دو افراد کو گرفتار کرلیا جو لاری ڈرائیور اور کلینر بتائے گئے جبکہ اصل سارق مفرور بتایا گیا ہے۔ کمشنر پولیس رچہ کنڈہ پولیس مسٹر مہیش بھگوت نے یہ بات بتائی۔ انہوں نے بتایا کہ ایک خفیہ اطلاع پر کارروائی کرتے ہوئے عبداللہ پور میٹ پولیس نے کارروائی انجام دی اور 36 سالہ ایس انیل کمار اور 40 سالہ ڈی سبارنا ساکن چنچولی کو گرفتار کرلیا جبکہ اصل شخص منور رحمن سعید مفرور بتایا گیا ہے جو حیدرآباد میں ایک ٹرانسپورٹ کمپنی چلاتا ہے۔ منور کی ایماء پر دونوں نے بیدر علاقہ سے لاری میں ریاست میں ممنوعہ تمباکو لوڈ کیا اور حیدرآباد آرہے تھے کہ خفیہ اطلاع پر پولیس نے اس سازش کو بے نقاب کردیا۔ کمشنر نے بتایا کہ تقریباً 25 لاکھ روپئے مالیتی ممنوعہ تمباکو لاری اور دو سیل فون ضبط کرلئے گئے۔
