کولکتہ : مغربی بنگال میں مسلم طبقہ پسماندگی کی زندگی ضرور گزارتا ہے، لیکن ریاست کی سیاست میں مسلمانوں کی اہمیت کو نظرانداز نہیں کیا جا سکتا۔ ریاست میں مسلمانوں کی آبادی 30% ہے۔ ریاست کے کئی اضلاع ایسے ہیں ، جہاں مسلم ووٹ کسی بھی سیاسی جماعت کی جیت میں اہم کردار ادا کرتا ہے۔ ایسے میں مسلم اکثریتی آبادی والے علاقوں سے مسلم امیدواروں کو میدان میں اتار کر بی جے پی جہاں اقلیتوں کا اعتماد حاصل کرنا چاہتی ہے ، وہیں ان چہروں کے سہارے مسلم آبادی والے اضلاع میں اپنی موجودگی بھی درج کرانا چاہتی ہے۔بی جے پی کی جانب سے پہلے جاری کی گئی فہرست میں مسلم امیدوار شامل نہیں تھے ، لیکن آج امیدواروں کی آخری فہرست میں 6 مسلم امیدواروں کو شامل کیا گیا ہے۔ پارٹی نے 2 مسلم خواتین سمیت 6 مسلم قائدین کو میدان میں اتارا۔ بتادیں کہ بی جے پی نے جمعرات کو 148 امیدواروں کی فہرست جاری ہے ، جس میں 6 مسلم امیدوار شامل ہیں۔