کابل : افغانستان کی راجدھانی کابل میں واقع حامد کرزئی انٹریشنل ایئرپورٹ کے نزدیک ہفتہ کی صبح ہندوستانیوں سمیت 150 سے زائد لوگوں کو اغوا کر لیا گیا تھا جس کے بعد عالمی سطح پر کافی تشویش کا ماحول پیدا ہو گیا تھا۔ کئی افراد ملک سے باہر نکلنے کے لیے کابل ائیرپورٹ پر جمع ہیں لیکن وہاں سے نکلنا بہت مشکل ہو رہا ہے۔ اس درمیان 150 سے زائد افراد کو طالبان کے ذریعہ جبراً اٹھا لیے جانے کی خبریں سامنے ا ٓئی تھیں، لیکن اب بتایا جا رہا ہے کہ پوچھ تاچھ کے بعد سبھی کو آزاد کر دیا گیا ہے۔میڈیا ذرائع سے موصول ہو رہی خبروں کے مطابق اس درمیان طالبان کے ترجمان احمداللہ واثق نے لوگوں کو اغوا کیے جانے یا جبراً اٹھائے جانے جیسی رپورٹ کی تردید کرتے ہوئے کہا کہ ایسا کچھ بھی طالبان کے ذریعہ نہیں کیا گیا ہے۔دراصل کابل کے ایک نیوز پورٹل نے قابل اعتماد ذرائع کے حوالے سے بتایا تھا کہ خواتین سمیت 150 افراد کو صبح کابل میں حامد کرزئی انٹرنیشنل ایئرپورٹ کے راستے میں اغوا کر لیا گیا ہے۔ ’کابل ناو‘ ویب سائٹ کی رپورٹ کے مطابق اغوا شدہ لوگوں میں کچھ افغانی شہری اور افغانی سکھ بھی شامل تھے، لیکن ان میں بیشتر ہندوستانی شہری تھے۔طالبان نے 150افراد کو اغوا کرنے کی تردید کی ہے ۔
