ملتان ۔ انگلینڈ کے سابق ٹسٹ کرکٹر کیون پیٹرسن نے ملتان ٹسٹ کی پچ پر پھر تنقید کی ہے۔ سماجی رابطے کی ویب سائٹ ایکس پر جاری کیے گئے بیان میں کیون پیٹرسن نے کہا ہے کہ یہ پچ اب بھی بولروں کے لیے قبرستان ہے۔ انہوں نے کہا کہ اگر یہ پچ تبدیل نہیں ہوتی اور مقابلے کا نتیجہ نہیں آتا تو اس سے ٹسٹ کرکٹ کو تباہ کرنے میں مدد ملے گی۔ واضح رہے کہ پاکستان کی بیٹنگ کے دوران بھی کیون پیٹرسن نے ملتان ٹسٹ کی پچ کو تنقید کا نشانہ بنایا تھا۔ پیٹرسن نے کہا تھا کہ ملتان کی وکٹ بولروں کے لیے قبرستان ہے۔ اس کے علاوہ انگلینڈ کے سابق کپتان مائیکل وان نے کہا تھا کہ ملتان کی وکٹ سڑک کا منظر پیش کررہی ہے۔ مائیکل وان نے کہا ہے کہ شان مسعود کی بیٹنگ کو دیکھ کر اچھا لگا، انہیں پچ سے بہت مدد مل رہی تھی۔یادر ہے کہ پاکستانی ٹیم جو کہ حالیہ عرصہ میں ناقص مظاہروں کی وجہ سے تنقید کی زد میں تھی اس نے رواں ٹسٹ کی پہلی اننگز میں 556 کا ہمالیائی اسکور بنایا جس میں کپتان شان مسعود، اوپنر عبدا للہ شفیق اور اسپنر سلمان آغا نے سنچریاں اسکور کی ہیں جبکہ انگلینڈ نے بھی پہلی اننگز میں روٹ کی سنچری درج کرلی ہے ۔
