نئی دہلی: ریلوے کے وزیر اشونی ویشنو نے آج کہا کہ گزشتہ 10 سالوں میں ملک میں ہر روز اوسطاً 15 کلومیٹر ریلوے ٹریک بچھایا جا رہا ہے ، وہیں متحدہ ترقی پسند اتحاد کی حکومت کے دس سالوں میں یہ اوسط صرف 04 کلومیٹر تھی۔ویشنو نے جمعہ کو راجیہ سبھا میں وقفہ سوالات کے دوران ضمنی سوالات کے جواب میں یہ اطلاع دی۔ ریلوے منصوبوں میں تاخیر سے متعلق سوال کے جواب میں انہوں نے کہا کہ 2014 سے اب تک 30 ہزار 336 کلومیٹر ریلوے ٹریک بچھایا جا چکا ہے ۔ انہوں نے کہا کہ کانگریس کی قیادت والی حکومت کے دس سالوں میں صرف 14,900 کلومیٹر ریلوے ٹریک بچھایا گیا۔ انہوں نے کہا کہ گزشتہ برسوں میں ریلوے ٹریک بچھانے کے کام میں تیزی لانے کے لیے بہت سی رکاوٹیں دور کی گئی ہیں۔ حکومت نے ریلوے کے لیے 2 لاکھ 52 ہزار کروڑ روپے مختص کیے ہیں۔ایک اور سوال کے جواب میں مسٹر ویشنو نے کہا کہ حکومت انٹرنیٹ کو محفوظ بنانے اور ڈیپ فیکس جیسے سنگین مسائل سے نمٹنے کے لیے درمیانی قوانین میں ترمیم کرنے جا رہی ہے ۔
