نئی دہلی، 19 اپریل (سیاست ڈاٹ کام) ملک میں کورونا وائرس (کووڈ ۔19) وباء کا قہر بڑھتا جا رہا ہے اور 1324 نئے معاملے سامنے آنے کے بعد متاثرین کی تعداد بڑھ کر 16116 ہو گئی اور 31 امزید لوگوں کی موت کے بعد اب تک اس وائرس کے انفیکشن سے 519 لوگوں کی موت ہو گئی ہے۔ وزارت صحت کی جانب سے اتوار کی شام جاری شدہ اعدادوشمار کے مطابق کورونا کی وباء ملک کی 33 ریاستوں اور مرکز کے زیر انتظام علاقوں میں پھیل چکی ہے۔ ملک میں انفیکشن کے اب تک کل 16116 معاملات کی تصدیق ہوئی ہے جن میں 77 غیر ملکی مریض بھی شامل ہیں۔ گزشتہ 24 گھنٹوں کے دوران کورونا سے 31 اور لوگوں کی موت کے بعد مرنے والوں کی تعداد 519 ہو گئی ہے۔ دریں اثناء کورونا سے متاثرہ لوگوں کی صحت مند ہونے کی رفتار بھی تیز ہوئی ہے اور گزشتہ 24 گھنٹوں میں کورونا سے متاثر 287 لوگوں کے صحت مند ہونے کے ساتھ ایسے لوگوں کی تعداد 2302 تک پہنچ گئی ہے۔کورونا سے سب سے شدید متاثر مہاراشٹر میں متاثرین کی تعداد میں ایک دن میں 328 کا اضافہ درج کیا گیا ہے اور کل اعداد و شمار 3651 ہوگئے ہیں ۔ گزشتہ 24 گھنٹوں کے دوران ریاست میں 10 لوگوں کی موت کے بعد اس وبا سے مرنے والوں کی تعداد بڑھ کر 211 ہو گئی ہے۔ ریاست میں 365 لوگ اس انفیکشن سے صحت مند بھی ہوئے ہیں۔ متاثرین کی تعداد کے معاملے میں دوسرے مقام پر ملک کی قومی دہلی ہے جہاں گزشتہ 24 گھنٹوں میں 186 نئے معاملات درج کئے جانے کی وجہ سے اب تک کل 1893 لوگ اس وباء سے متاثر ہوئے ہیں اور اس دوران مرنے والوں کی تعداد بڑھ کر 43 ہوگئی ہے۔ دارالحکومت میں کل 72 مریضوں کو علاج کے بعد ہسپتال سے چھٹی دے دی گئی ہے۔اس کے بعد گجرات میں متاثرین کی تعداد میں بھی اضافہ دیکھا اور یہ 332 نئے مریضوں کے ساتھ 1604 ہوگئی اور 10 اور لوگوں کی موت کے بعد مرنے والوں کی تعداد 58 تک پہنچ گئی ہے۔ مدھیہ پردیش میں بھی متاثرین کی تعداد میں اضافہ دیکھا اور وہاں 52 نئے کیس سامنے آنے سے متاثرین کی تعداد بڑھ کر 1407 ہو گئی ہے جبکہ ریاست میں ایک اور شخص کی موت کے بعد مرنے والوں کی تعداد 70 ہو گئی ہے۔ تمل ناڈو میں 49 نئے متاثرہ سامنے آئے ہیں اور متاثرہ مریضوں کی تعداد بڑھ کر 1372 ہو گئی ہیں اور ریاست میں اب تک 15 لوگوں کی موت ہو چکی ہے۔
