مہلوکین کے ورثا کو فی کس 5 لاکھ روپئے ایکس گریشیا دینے چیف منسٹر ادھو ٹھاکرے کا اعلان
ممبئی: شہر ممبئی میں کورونا وائرس کے مریضوں کا علاج کرنے والے ایک پرائیویٹ ہاسپٹل کی عمارت میں آگ لگنے سے کم از کم 10 افراد ہلاک ہو گئے ہیں۔خبر رساں ادارے اے پی کے مطابق جمعے کو آگ لگنے کے بعد ممبئی کے سن رائز ہاسپٹل (جو ایک عمارت میں قائم تھا) سے 70 سے زیادہ مریضوں کو شہر کے دیگر ہاسپٹلس میں منتقل کیا گیا۔حکام کے مطابق آگ لگنے کی وجہ معلوم کی جا رہی ہے۔آگ بجھانے والے عملے کے ایک رکن کے مطابق یہ ابھی تک واضح نہیں کہ ہلاک ہونے والے افراد میں کتنے کورونا وائرس کا شکار تھے۔ہاسپٹل نے بیان میں کہا ہے کہ آگ گراؤنڈ فلور پر لگی جس کے بعد دھواں ہاسپٹل کے دیگر حصوں تک پھیل گیا۔انڈیا کے وزیراعظم نریندر مودی نے انسانی جانوں کے نقصان پر دکھ کا اظہار کیا ہے۔گذشتہ برس اگست میں احمد آباد کے ایک ہاسپٹل میں آگ لگنے سے کورونا وائرس کے آٹھ مریض ہلاک ہوئے تھے۔دیکھ بھال کے ناقص انتظامات اور آگ بجھانے والے آلات کی کمی انڈیا میں اکثر اموات کا سبب بنتی ہے۔چیف مسٹر ادھوٹھاکرے نے مہلوکین کے ورثا کو فی کس 5 لاکھ ایکس گریشیاء دینے کا اعلان کیا۔