وہ جو کچھ بھی کریں گی بی جے پی کو شکست دینے کے جذبہ سے کریں گی ، جئے رام رمیش کی گوہاٹی میں پریس کانفرنس
نئی دہلی/گوہاٹی: کانگریس نے آج کہا کہ ترنمول کانگریس کی لیڈر ممتا بنرجی انڈیا اتحاد کا ایک اہم حصہ ہیں اور ان کے بغیر اس اتحاد کی کوئی اہمیت نہیں ہے ۔کانگریس کے میڈیا انچارج جے رام رمیش نے آج آسام کے گوہاٹی میں ایک پریس کانفرنس میں ایک سوال کے جواب میں کہا کہ ممتا نے کہا کہ ہم بی جے پی کو شکست دینا چاہتے ہیں۔ہم بی جے پی کو شکست دینے کے لیے کوئی قدم پیچھے نہیں ہٹائیں گے اور اسی جذبے کے ساتھ راہول گاندھی کی بھارت جوڑو نیا ئے یاترا مغربی بنگال میں داخل ہو رہی ہے ۔بھارت جوڑو نیا ئے یاترا سے متعلق ممتا کے بیان پر انہوں نے کہا کہ کچھ رکاوٹیں آتی رہتی ہیں، انہیں دور کیا جا رہا ہے ۔ ترنمول کانگریس اور ممتا بنرجی انڈیا اتحاد کے بڑے لیڈر ہیں اور ان کے بغیر انڈیا اتحاد کا تصور نہیں کیا جاسکتا۔ رمیش نے کہا کہ بنرجی کے ساتھ بات چیت جاری ہے اور رکاوٹوں کا حل تلاش کیا جائے گا۔ ممتا نے خود کہا ہے کہ بی جے پی کو شکست دینا انکی ذمہ داری ہے ، ان کی ترجیح ہے اور اس کے لیے وہ جو کچھ بھی کرسکتی ہیں، وہ کریں گی۔ اسی جذبے کے ساتھ بھارت جوڑو نیا ئے یاترا بنگال میں داخل ہو رہی ہے ۔ اتحاد میں جو بھی رکاوٹیں ہیں وہ بات چیت کے ذریعے دور کی جائیں گی اور انڈیا اتحاد ملک بھر میں مل کر کام کرے گا۔ جے رام رمیش نے کہا کہ ہم نظریات کی جنگ لڑ رہے ہیں اور کانگریس کا مقصد آنے والے عام انتخابات میں صرف بھارتیہ جنتا پارٹی ( بی جے پی ) کو شکست دینا ہے ۔ آسام کے وزیراعلی ہمنتا بسوا سرما ایک نظریے کی علامت ہیں جس نے سماج کے مختلف طبقات کے ساتھ ناانصافی کی ہے ۔ یہاں بسوا سرما کی قیادت میں کرپشن اپنے عروج پر ہے ، اسی لئے راہول وزیر اعلیٰ کے خلاف بول رہے ہیں۔ میں آسام کے وزیر اعلیٰ کا شکریہ ادا کرنا چاہتا ہوں جنہوں نے اپنی دھمکیوں کے ساتھ ہماری یاترا کی تشہیر کی۔ ہم ڈرنے والے نہیں ہیں۔ ہم پیچھے نہیں ہٹیں گے ۔انہوں نے کہا کہ کل بھارت جوڑو نیا ئے یاترامغربی بنگال پہنچے گی اور 26-27جنوری کو آرام کرنے کے بعد 28 جنوری کو یاترا مغربی بنگال میں شروع ہوگی۔ بھارت جوڑو نیا ئے یاترا’ 20 مارچ تک ختم ہونے کا امکان ہے اور 20 سے 23 مارچ کے درمیان ‘بھارت جوڑو نیائے یاتراممبئی پہنچے گی اور اس کے بعد ہماری تنظیم انتخابی عمل میں شامل ہو جائے گی۔ کل راہول گاندھی جی نے انتخابی بگل بجایا ہے جو کہ 5 نیائے پر مبنی ہے ۔اس دوران کانگریس لیڈر کنہیا کمار نے نئی دہلی میں پارٹی ہیڈکوارٹر میں ایک پریس کانفرنس میں کہا کہ ‘بھارت جوڑو نیا ئے یاترا’ صرف ملک میں سماجی، اقتصادی اور سیاسی انصاف قائم کرنے کے لیے منعقد کی جا رہی ہے ۔ موجودہ حالات میں ملک کے نوجوانوں کے لئے انصاف، بھاگیداری میں انصاف، خواتین کے لئے انصاف، کسان کے لئے انصاف اور مزدور کے لئے انصاف کی ضرورت ہے ۔ انہوں نے کہا کہ ملک کی آبادی کی اکثریت ابھی تک انصاف تک مکمل رسائی سے باہر ہے ۔