پہلے 50 دفعہ نارتھ ایسٹ گئے اب کنڈی لگاکر بیٹھ گئے: چیف منسٹر دہلی
نئی دہلی : دہلی اسمبلی کا خصوصی اجلاس جاری ہے۔ اس خصوصی اجلاس کے آج دوسرے دن عام آدمی پارٹی چیف اور دہلی کے وزیر اعلیٰ اروند کجریوال نے منی پور کے واقعہ پر اپنی بات رکھی۔ اس دوران انھوں نے کہا کہ بی جے پی قائدین کہہ رہے ہیں کہ اس اسمبلی کا منی پور سے کوئی لینا دینا نہیں ہے، کئی مہینوں سے منی پور جل رہا ہے، لیکن وزیر اعظم مودی نے کچھ نہیں کہا۔ منی پور میں 6500 ایف آئی آر درج ہو گئیں اور 150 سے زیادہ اموات ہو گئیں، لیکن مودی خاموش رہے۔پوری دنیا میں جگ ہنسائی ہو رہی ہے، لیکن ہندوستان کے وزیر اعظم خاموش رہے۔ جب ایک دن ویڈیو وائرل ہوا تب بھی وہ خاموش رہے۔ ان کے وزیر اعلیٰ کہتے ہیں کہ یہ کوئی آئسولیٹیڈ انسیڈنٹ (الگ تھلگ واقعہ) نہیں ہے، یہ تو روزانہ ہو رہا ہے۔کجریوال نے یہاں تک کہا کہ لوگ ہر وقت وزیر اعظم کو نہیں یاد کرتے، لیکن وزیر اعظم کو تب ضرور یاد کرتے ہیں جب سبھی سسٹم فیل ہو جاتے ہیں۔ بے لباس خواتین کیلئے سب کچھ فیل ہو گیا تھا ۔وزیر اعظم کی عمر کے حساب سے وہ ان کے باپ کے برابر ہیں۔بیٹیوں کی سرعام عزت لوٹی جا رہی ہے اور باپ کہے کہ اس سے میرا کوئی لینا دینا نہیں ہے۔ کیجریوال نے ایک وائرل ویڈیو کا بھی تذکرہ کیا۔ بی جے پی کا کہنا ہے کہ یہ پہلے وزیر اعظم ہیں جو 50 بار نارتھ ایسٹ گئے تھے۔ اب جبکہ منی پور کے اندر مصیبت آئی ہے تب آپ کو خیال نہیں آیا، تب آپ اپنے گھر کے اندر کنڈی مار کر بیٹھ گئے۔