نئی دہلی: کانگریس جنرل سکریٹری پرینکا گاندھی واڈرا نے بیروزگاری پر وزیراعظم نریندر مودی کو نشانہ بناتے ہوئے آج کہا کہ وہ الیکشن آتے ہی گیارنٹی کی بات کرنے لگتے ہیں لیکن حقیقت تویہ ہے کہ مودی روزگار نہیں ، بیروزگاری کی گیارنٹی ہیں۔ پرینکا نے کہا کہ اعداد و شمار کے مطابق ملک میں تقریباً 30 لاکھ سرکاری عہدے خالی ہیں، ہمارے کروڑوں نوجوان نوکریوں کے انتظار میں ہیں لیکن گزشتہ 10 سال میں بی جے پی حکومت نے ان عہدوں کو پُر کرنے کیلئے دکھاوے کے سوا کچھ نہیں کیا۔ انہوں نے کہا کہ جولائی2022میں حکومت نے پارلیمنٹ کو بتایا تھا کہ8 سال میں 22کروڑ نوجوانوں نے نوکریوں کیلئے درخواست دی لیکن صرف 7 لاکھ نوجوانوں کو نوکریاں ملیں۔ اس کا مطلب ہیکہ تقریباً 21.93کروڑ اہل نوجوان بیروزگار رہ گئے ۔ سالانہ دو کروڑ نوکریوں کا وعدہ کرنے والی بی جے پی حکومت نہ پہلے سے موجودہ نوکریاں دے سکی اور نہ ہی نئے روزگار کے مواقع پیدا کرسکی ۔
وزیراعظم الیکشن میں گارنٹی دیتے ہیں درحقیقت ان کی گارنٹی صرف -‘بے روزگاری کی ہی گارنٹی’ ہے ۔