عموماً ہمارے ہاں گھر کی چھت بے کار، اُجاڑ اور بیابان ہوتی ہے۔اس کو ایک قسم کا اسٹور سمجھ کر کاٹھ کباڑ اور غیر ضروری اشیاء رکھنے کی جگہ کے طور پر کام میں لیا جاتا ہے، یا کہیں اسے کپڑے دھونے اور انہیں سُکھانے کیلئے استعمال کیا جاتا ہے۔گھر والوں کو چھت پر جانے کا خیال بارش کے موسم میں آتا ہے یا پھر بجلی کی لوڈ شیڈنگ کے دوران تازہ ہوا کے حصول کیلئے، ورنہ تو چھت بے وقعت سمجھی جاتی ہے۔ گھر کی تعمیر کے دوران چھت کے بنتے ہی تعمیراتی کام ختم کر دیا جاتا ہے، جس کی وجہ یہ ہوتی ہے کہ یا تو بجٹ ٹھکانے لگ جاتا ہے یا پھر چھت کو آراستہ کرنے کا کام ’’بعد پر‘‘ ٹال دیا جاتا ہے۔آپ کے گھر کی چھت بھی اگر آپ کے نظرِ کرم کی منتظر ہے تو اسے آراستہ کرنے کے چند ایک آئیڈیاز پر کام کیا جا سکتا ہے۔
ٹائلز لگائیں : چھت کے فرش کو نامکمل چھوڑنے سے بہتر ہے کہ اسے مکمل کر لیا جائے اور اگر رنگین ٹائلز یا سرامکس کا استعمال کر لیا جائے تو آپ خود محسوس کریں گے کہ اس کی خوبصورتی میں اضافہ ہو گیا ہے۔ اس کا فائدہ یہ بھی ہے کہ پانی ٹھہرے گا نہیں اور دھلائی یا صفائی آسان ہو جائے گی۔بچوں کو کھیلنے یا سائیکل وغیرہ چلانے میں بھی مزہ آئے گا اور آپ بھی گرمیوں کی شاموں سے لطف اندوز ہو سکیں گے۔
بیٹھک بنائیں : چھت کو ڈیزائن کرتے وقت اس بات کا ضرور دھیان رکھا جاتا ہے کہ اس کو کس طرح زیادہ سے زیادہ کھلا اور خوبصورت بنایا جائے، جو آپ کے بیٹھنے کی ضرورت کو بھی پورا کرے اور دلکش بھی لگے۔ اکثر لوگ اس مقصد کیلئے ماہرین سے مشورہ کرتے ہیں، جو کہ ایک بہتر طریقہ بھی ہے۔
ڈائننگ ایریا : آپ اپنی چھت کو کھانا کھانے کی جگہ بھی بنا سکتے ہیں۔کرسیوں اور کھانے کی میز کو اپنی چھت پر لگائیں اور منفرد روشنیوں کا استعمال کر کے کھانے کا لُطف دوبالا کریں۔
اضافی کچن کا آپشن : اگر آپ کے گھر کی چھت خوبصورت انداز سے بنی ہے تو آپ اس میں تھوڑی سی بہتری کر کے اسے مزید خوبصورت بنا سکتے ہیں۔ چھت پر کچن بنانے کے تصور کو اچھا سمجھا جاتا ہے۔گھر کے تمام افراد مل کر آپس میں گفتگو کرتے ہوئے اپنی پسند کے کھانے بنا سکتے اور لطف اندوز ہو سکتے ہیں۔اگر کچن کا آئیڈیا مناسب نہ لگے تو باربی کیو کاؤنٹر بھی بنایا جا سکتا ہے اور باربی کیو پارٹیز سے لطف اٹھایا جا سکتا ہے۔
مطالعہ کی جگہ : اگر آپ کتابیں پڑھنے کے شوقین ہیں تو چھت اس مقصد کیلئے بہترین ثابت ہو سکتی ہے، کھلی فضا اور تنہائی میں آپ مطالعہ سے لطف اندوز ہو سکتے ہیں۔ چھت پرایک چھوٹی سی لائبریری بھی بنائی جا سکتی ہے، جو اسکول یا کالج کی پڑھائی کیلئے استعمال ہو سکتی ہے۔
مہمانوں کیلئے : کھلی چھت بیک وقت بہت سے مقاصد کیلئے استعمال ہو سکتی ہے۔اگر آپ کے گھر زیادہ مہمان آئے ہوئے ہیں اور کھانے کے کمرے میں جگہ اتنی کم ہے کہ آپ کو اپنے مہمانوں کی تواضع کرنے میں مشکل پیش آ رہی ہے، تو پریشان ہونے کی ضرورت نہیں، آپ کی چھت اس مقصد کیلئے بہترین ثابت ہو سکتی ہے۔
باغ لگائیں : بازاروں میں ایسی اشیاء باآسانی دستیاب ہیں جن میں بغیر کسی نقصان کے چھتوں پر خوبصورت باغ بنانے کیلئے مناسب سائز کے پودے لگائے جا سکتے ہیں۔یہ خیال رکھنا ضروری ہے کہ چھت پر پودوں کیلئے جو گملے یا کیاریاں بنائی جائیں ان میں فالتو پانی کے نکاس کا ایسا نظام موجود ہو کہ نہ تو وہ کیاری یا گملے میں رہ جائے اور نہ ہی چھت کو نقصان پہنچا سکے۔گملوں اور کیاریوں کو چھت پر اس انداز سے رکھا جائے کہ چھت سے ان کے پیندے کی اونچائی کم از کم 3 انچ ہو، تاکہ اضافی پانی گملوں سے باآسانی خارج ہو اور چھت پر نہ ٹھہرے۔اس طرح چھت کی سطح بھی خشک رہے گی اور چھت ٹپکنے یا عمارت کو پانی سے نقصان پہنچنے کا خطرہ بھی نہیں ہو گا۔