جناب زاہد علی خاں ایڈیٹر سیاست کا اظہار دکھ ، درجات کی بلندی کیلئے دعائیں
حیدرآباد۔13اپریل(سیاست نیوز) صدر مسلم پرسنل لاء بورڈ مولانا رابع حسنی ندوی کا سانحہ ارتحال امت مسلمہ اور برصغیر میں اتحاد امت کے لئے عظیم نقصان ہے۔ جناب زاہد علی خان ایڈیٹر روزنامہ سیاست نے مولانا رابع حسنی ندوی کے انتقال پر اپنے گہرے دکھ کا اظہار کرتے ہوئے کہا کہ مولانا کی شخصیت نے ہندستان میں مسلمانوں کے درمیان اتحاد و اتفاق پیدا کرنے اور انہیں متحد رکھنے میں کلیدی کردار ادا کیا ۔ایڈیٹر سیاست نے اپنے تعزیتی پیام میں کہا کہ مولانا رابع حسنی ندوی نے انتہائی سادہ زندگی گذارتے ہوئے عالم باعمل و صوفی باصفاء کی عملی صورت پیش کی تھی۔ انہوں نے مولانا کے سانحۂ ارتحال پر صدمہ کا اظہار کرتے ہوئے کہا کہ وہ اللہ سے دعاء گو ہیں کہ اللہ امت مسلمہ کی رہنمائی و رہبری کے لئے بہترین نعم البدل عطاء کرے اور مرحوم کے درجات کو بلند کرے۔ انہو ںنے افراد خاندان سے تعزیت کرتے ہوئے کہا کہ اللہ اس خانوادہ سے مزید رہبران قوم وملت پیدا کرے جو کہ برصغیر کے علاوہ عالم اسلام میں بطور محافظ شریعت خدمات انجام دے سکیں۔
