نئی دہلی: پارلیمنٹ کے آئندہ خصوصی اجلاس میں 19 ستمبر کو گنیش چترتھی سے نئے پارلیمنٹ ہاؤس میں کام شروع ہونے کا امکان ہے ۔ابھی تک اس حوالے سے کوئی باضابطہ اطلاع نہیں آئی ہے۔ تاہم تیاریوں کو دیکھتے ہوئے کہا جا رہا ہیکہ 18 ستمبر کو پارلیمنٹ کا خصوصی اجلاس پرانی عمارت سے شروع ہوگا۔ پارلیمنٹ کی نئی عمارت میں 19 ستمبر بروز منگل گنیش چترتھی کے دن کام شروع ہو سکتا ہے۔ واضح رہیکہ نئے پارلیمنٹ ہاؤس کا سنگ بنیاد دسمبر 2020 میں وزیر اعظم نریندر مودی نے رکھا تھا اور رواں سال 28 مئی کو مودی نے اس کا افتتاح کیا تھا۔ پارلیمنٹ کی اس نئی عمارت کو ٹاٹا پروجیکٹس لمیٹڈ نے تعمیر کیا ہے اور اس پر 862 کروڑ کی لاگت آئی ہے ۔ حکومت نئے پارلیمنٹ ہاؤس میں کسی تاریخی اور بڑے کام کے ساتھ کام شروع کرنا چاہتی ہے۔
