تیجسوی یادو دوبارہ ڈپٹی سی ایم بن گئے، آر جے ڈی لیڈر نے حلف برداری کے بعد نتیش کمار سے آشیرواد لیا
پٹنہ: جنتا دل یونائیٹڈ (جے ڈی یو) کے سابق قومی صدر نتیش کمار نے آج آٹھویں بار بہار کے وزیر اعلی کے عہدے کا حلف لیا۔ گورنر فاگو چوہان نے چہارشنبہ کو یہاں گورنر ہاؤس میں نتیش کمار کو ریاست کے وزیر اعلی کے طور پر عہدے اور رازداری کا حلف دلایا۔ نتیش کمار کے ساتھ سینئر راشٹریہ جنتا دل (آر جے ڈی) لیڈر تیجسوی پرساد یادو نے کابینی وزیر کے طور پر حلف لیا۔ اس کے ساتھ نتیش کمار آٹھویں بار بہار کے چیف منسٹر بنے ہیں اور تیجسوی یادو کو دوسری بار نائب وزیر اعلیٰ بنایا گیا ہے ۔ گرینڈ الائنس کی نئی حکومت میں وزراء کونسل کی توسیع جلد کی جائے گی۔ حلف برداری کی تقریب میں سابق وزیر اعلیٰ رابڑی دیوی، تیجسوی کی اہلیہ رچل راج شری یادو، ایم ایل اے تیج پرتاپ یادو کے ساتھ ساتھ آر جے ڈی صدر لالو پرساد یادو کے خاندان کے دیگر افراد بھی موجود تھے ۔ تاہم، لالو پرساد یادو خرابی صحت کی وجہ سے تقریب میں شرکت نہیں کر سکے۔ تیجسوی نے حلف لینے کے بعد چیف منسٹر نتیش کمار کے پیر چھوئے اور ان سے آشیرواد حاصل کیا۔ نتیش کمار نے گرمجوشی سے تیجسوی کو گلے لگالیا۔ حلف برداری کے لیے راج بھون روانگی سے قبل نتیش کمار نے فون پر آر جے ڈی سربراہ لالو پرساد سے بات کی۔ حلف برداری کے بعد چیف منسٹر نے کہا کہ 2020ء کے اسمبلی الیکشن کے بعد میں بہار کا چیف منسٹر نہیں بننا چاہتا تھا۔ ہماری پارٹی کو بی جے پی کے ساتھ اتحاد کے بعد نقصان ہوا۔ یہ صورتحال گزشتہ دو مہینوں میں بگڑکر ابتر ہوگئی۔ چیف منسٹر نتیش نے حلف برداری کے بعد پہلا کابینی اجلاس منعقد کیا ۔ یہ تجویز منظور کی گئی کہ 24اگست کو اسمبلی میں اکثریت ثابت کی جائے گی ۔