پولیس عہدیدار فرقہ پرستوں کے آلہ کار نہ بنیں‘ محمود مدنی کا امیت شا ہ کو مکتوب
نئی دہلی :حیدرآباد: صدر جمعیت علماء ہند مولانا محمود اسعد مدنی نے کہا ہے کہ دہلی میں نمازیوں سے غیر اخلاقی حرکت سے عالمی سطح پر ملک کی شناخت متاثر ہوئی ہے ۔ اس طرح کے عمل سے عالمی سطح پر ہندوستان کی شناخت کافی خراب ہوگی۔ مولانا مدنی نے اس سلسلے میں وزیر داخلہ امیت شاہ اور دہلی کے ایل جی کو خط لکھ کر قصوروار پولیس عہدیدار کو ہر طرح کی ذمہ داری سے سبکدوش کرنے کا مطالبہ کیا ہے۔مولانا مدنی کا کہنا ہے کہ پولیس کے غیر اخلاقی رویے سے ظاہر ہوتا ہے کہ وہ اسلاموفوبیا کے مرض میں مبتلا ہے اور فرقہ پرست طاقتوں کی سوچ سے متاثر ہے۔ اس لیے فکری اصلاح کے ساتھ اس کو اپنے کام کے تئیں ذمہ دار ہونے کی ٹریننگ دیا جانا ضروری ہے۔ مولانا مدنی نے اپنے مکتوب میں امیت شاہ کو فوری طو پر متوجہ کرتے ہوئے کہاکہ قانون نافذ کرنے والے اداروں کو ہدایات جاری کریں کہ وہ تمام شہریوں کی حفاظت کو ترجیح دیں، خواہ ان کا مذہبی پس منظر کچھ بھی ہو۔قانون کو اپنے ہاتھ میں لینے کے بجائے ان کی جانوں اور ان کی آزادیوں کا تحفظ کیا جائے اور فرقہ پرست اور ملک کو توڑنے والی طاقتوں کا آلہ کار بننے والے پولیس افسران پر سخت کارروائی کی جائے۔ شالی دہلی کے اندر لوک میں جمعہ کی نماز کے دوران پولیس کی نفرت سے بھری کاروائی سے عوام میں غم وغصہ دیکھا جارہا ہے ۔