اغیار تک اللہ کا پیام پہونچانا امت مسلمہ کی ذمہ داری ۔ پرگی میں تبلیغی جماعت کے اجتماع کا آغاز۔ علماء کے خطاب
حیدرآباد 6 جنوری (سیاست نیوز) شہر کے نواحی علاقہ پرگی میں آج تبلیغی جماعت کے سہ روزہ صوبائی اجتماع کا روح پرور مناظر کے ساتھ آغاز ہوا ۔ پرگی جانے والی تمام سڑکوں پر سروں کا سمندر دیکھا گیا جہاں زائد از 3لاکھ افراد سہ روزہ اجتماع میں شرکت کیلئے جمع ہیں۔ اجتماع میں دونوں شہروں کے علاوہ تمام اضلاع سے مسلمانوں کی بڑی تعداد پہنچ چکی ہے اس کے علاوہ پڑوسی ریاستوں آندھراپردیش ‘ کرناٹک ‘ مہاراشٹرا کے مسلمانوں کی بڑی تعداد بھی پرگی اجتماع گاہ پہنچ چکی ہے جہاں ان کے خصوصی انتظامات کئے گئے ہیں۔ سہ روزہ اس اجتماع کے دوران شرکاء کو زندگی گذارنے کی عملی تربیت کے علاوہ عبادتوں کے طریقہ اور دنیا میں انسان کی آمد کے مقاصد کے متعلق تربیت کی جائے گی۔ اجتماع کے دوران ملک کی مختلف ریاستوں کے سرکردہ علمائے اکرام کے خطابات ہوں گے اور اس اجتماع سے خطاب کرتے ہوئے علمائے اکرام شرکاء میں للہیت پیدا کرنے کے علاوہ اللہ سے محبت کے پیغام کو عام کریں گے۔ اجتماع کے پہلے دن صبح کی اولین ساعتوں سے ہی اجتماع گاہ میں لاکھوں کی تعداد میں شرکاء پہنچ چکے تھے جن کیلئے وسیع انتظامات تھے ۔ آج ملک کے مختلف حصوں سے شرکت کے لئے پہنچنے والے علماء اکرام نے شرکاء کو خلوص دل کے ساتھ اللہ کی عبادت کی تلقین کی اور کہا کہ بندۂ مومن کو اللہ تعالیٰ نے روئے زمین پر عارضی زندگی گذارنے بھیجا ہے اور اللہ کے رسولﷺ نے ہمیں اپنی اخروی زندگی جو کہ دائمی ہے اس کو کامیاب بنانے کے طریقہ سکھائے ہیں ۔ اللہ اور اس کے رسولؐ کی پیروی میں ہی انسان کی کامیابی پنہا ہے اور جو اللہ کی کتاب اور نبیؐ پاک کی سنت کو اپنی زندگیوں میں داخل کرلیں گے ان کیلئے کامیابی ہی کامیابی ہے۔ علماء اکرام نے نوجوانوں میں بگاڑ کو دور کرنے دینی تعلیمات اور معلومات کو عام کرنے ‘ان میں دعوت و تبلیغ کے کام کی اہمیت کو واضح کرتے ہوئے کہا کہ امت میں بگاڑ پر محض افسوس یا آنسو بہانے سے کچھ نہیں ہوگا بلکہ امت کے نوجوانوں کی کردار سازی کیلئے دعوت کے کام کو وسعت دینے کی ضرورت ہے۔ علماء نے ملک بھر میں دعوت کے کام کا تذکرہ کرتے ہوئے کہا کہ اللہ تعالیٰ اپنے دین کی محنت کیلئے بندوں کا انتخاب کرتا ہے اور اللہ کے راستہ میں دین متین کی دعوت کیلئے نکلنے والوں کو چاہئے کہ وہ اپنی متانت اور شائستگی کے ساتھ ہر شخص کے ساتھ پیش آئیں ۔ اللہ کو راضی کرنے ظاہر و باطن کو یکساں بنانے کے ساتھ اوروں کو بھی راہ نجات کی طرف دعوت دینے کا کام کریں کیونکہ اللہ تعالیٰ نے امت مسلمہ پر یہ ذمہ داری عائد کی ہے کہ وہ اس دنیا میں موجود ہر شخص تک اللہ کے پیام کو پہنچانے میں اپنا کردار ادا کرے۔ اجتماع کے دوران مختلف وفود نے دعوت و تبلیغ کے تجربات بیان کئے اور کہا کہ ملک کے موجودہ حالات میں بھی اللہ کے فضل و کرم سے دعوت دین کا کام جاری اور مسلمان اپنے کردار کے ذریعہ اغیار تک پیغام پہنچا سکتا ہے۔ اجتماع کیلئے وسیع مطبخ لگائے گئے اور اس کے علاوہ اطراف علاقوں میں محبانان سے شرکاء کیلئے خصوصی سہولتوں کے اقدامات کئے جا رہے ہیں۔ شرکاء کیلئے منتظمین نے بڑے پیمانے پر اہتمام کے علاوہ آئندہ دو یوم کیلئے خصوصی تیاریاں بھی کی ہوئی ہیں۔ 7 جنوری اتوار کو اجتماع میں زائد از 4 لاکھ افراد کی شرکت متوقع ہے کیونکہ اس صوبائی اجتماع میں شہر سے تعلق رکھنے والوں کی اتوار کو شرکت کے خصوصی انتظامات کئے گئے ہیں۔ 3