نئی دہلی۔ 4 ڈسمبر (ایجنسیز) سینئر آئی اے ایس افسر (ریٹائرڈ) نونیت کمار سہگل نے پرسار بھارتی کے چیئرمین کے عہدہ سے اچانک استعفیٰ دے دیا ہے۔ سہگل کو 16 مارچ 2024 کو پرسار بھارتی بورڈ کا چیئرمین مقرر کیا گیا تھا لیکن انہوں نے اپنی تقرری کے صرف ایک سال اور آٹھ ماہ بعد استعفیٰ دے دیا۔انہوں نے 2 دسمبر کو اپنا استعفیٰ پیش کیا جسے وزارت اطلاعات و نشریات نے پرسار بھارتی ایکٹ 1990 کے سیکشن 7(6) کے تحت فوری طور پر قبول کر لیا ہے۔ سہگل کے اچانک استعفیٰ نے پرسار بھارتی اور حکومتی حلقوں میں کئی سوالات کو جنم دیا ہے۔وہ 1988 بیچ کے اترپردیش کیڈر کے افسر ہیں۔
نے ریاستی اور مرکزی دونوں سطحوں پر کئی اہم عہدوں پر کام کیا ہے۔
انہوں نے پرنسپل سکریٹری سیاحت، پرنسپل سکریٹری ایم ایس ایم ای، انرجی ڈپارٹمنٹ کے سکریٹری، اور چیف منسٹر آفس کے عہدوں پر کلیدی کردار ادا کیا۔ سہگل تقریباً 35 سال کی انتظامی خدمات کے بعد ریٹائر ہوئے۔
مارچ 2024 میں چیئرمین بننے کے بعد، انہوں نے تنظیمی اصلاحات، طویل مدتی حکمت عملی اور سرکاری نشریاتی نظام کو مزید جدید اور مسابقتی بنانے جیسے مسائل پر کام شروع کیا۔ تاہم، اس کے اچانک ختم ہونے کی وجوہات پر ابھی تک کوئی سرکاری تبصرہ نہیں کیا گیا ہے۔
وزارت کی جانب سے ان کا استعفیٰ قبول کرنے کے باوجود، سہگل کی جانب سے کوئی عوامی بیان سامنے نہیں آیا ہے اور نہ ہی پرسار بھارتی نے اس کی وجہ واضح کی ہے۔ یہ ایک نئی داخلی بحث کا موضوع ہے کہ آیا استعفیٰ ذاتی وجوہات کی بنا پر تھا یا تنظیم کے اندر اختلافات یا دباؤ کا نتیجہ تھا۔
