مغربی بنگال کی وزیر اعلیٰ اور ترنمول کانگریس کی سربراہ ممتا بنرجی بدھ کو انتخابی مہم کے لیے وارانسی پہنچ گئیں۔وہ آج کو وارانسی میں ایس پی سربراہ اکھلیش یادو کے ساتھ ایک ریلی کریں گی۔ قبل ازیں ممتا بنرجی کل دشاسوامیدھ گھاٹ کی آرتی دیکھنے گئیں۔ اس دوران بی جے پی کے حامیوں نے نعرے بازی کی۔جواب میں ممتا کے حامیوں نے بھی نعرے لگائے۔ اکھلیش یادو نے ممتا بنرجی پر سیاہ جھنڈے دکھانے کا الزام لگانے والے بی جے پی کارکنوں پر طنز کیا جیسے ہی ممتا بنرجی دشاسوامیدھ گھاٹ میں آرتی کے مقام پر پہنچیں بی جے پی کے حامیوں نے ‘مودی-مودی’ کے نعرے لگانے شروع کردیئے۔ ممتا بنرجی کے حامیوں نے بھی ممتا دیدی کے نعرے لگائے۔ دونوں کے حامیوں کے درمیان جم کر نعرے بازی ہوئی۔ اس سے ناراض ممتا گھاٹ کی سیڑھیوں پر بیٹھ گئیں۔ اگرچہ ان کے لیے آرتی میں بیٹھنے کا انتظام کیا گیا تھا لیکن احتجاج سے ناراض ممتا بنرجی نے سیڑھیوں پر بیٹھ کر ناراضگی کا اظہار کیا۔
