حیدرآباد :۔ سعید آباد علاقے میں ایک دلخراش واقعہ پیش آیا جس میں ایک اپارٹمنٹ کے واچ مین نے ٹرانسفارمر کے تار کو چھو کر خود کشی کرلی ۔ تفصیلات کے بموجب 35 سالہ اکبر خاں جو سلیم خاں کا بیٹا تھا اور اکبر باغ میں واقع بشارت اپارٹمنٹ کا واچ مین تھا ۔ پولیس نے بتایا کہ اکبر خاں اور اس کی بیوی میں جھگڑا ہوا کرتا تھا اور وہ شراب نوشی کیا کرتا تھا ۔ آج بھی میاں بیوی کے درمیان جھگڑا ہوا اس کے بعد اکبر خاں نے بیوی کو یہ دھمکی دی کہ وہ خود کو ختم کرلے گا ۔ اس کے بعد وہ دلکشا فنکشن ہال سے متصل ایک ٹرانسفارمر پر چڑ گیا اور ہائی ٹنشن وائر کو چھونے کے نتیجہ میں وہ شدید جھلس گیا اور نیچے گرپڑا ۔ اس واقعہ میں وہ برسر موقع ہلاک ہوگیا اور اس کے سر پر گہرا زخم آیا ۔ واچ مین اکبر خاں کی جانب سے ٹرانسفارمر پر چڑھنے اور خود کشی کے منظر کو راہگیروں نے اپنے موبائل فون پر قید کیا اور کچھ ہی دیر میں یہ ویڈیو سوشیل میڈیا میں وائرل ہوگیا ۔ پولیس سعید آباد نے اس سلسلہ میں ایک مقدمہ درج کرتے ہوئے اس کی نعش کو بغرض پوسٹ مارٹم کے دواخانہ عثمانیہ کے مردہ منتقل کردیا ۔
