دوسری ہند۔ نارڈک چوٹی کانفرنس میں شرکت ، فرانسیسی صدر میکرون سے پیرس میں ملاقات
نئی دہلی: وزیر اعظم نریندر مودی چہارشنبہ کو ڈنمارک کی طرف سے منعقد ہونے والی دوسری ہند۔نارڈک چوٹی کانفرنس میں شرکت کریں گے اور بعد میں پیرس جائیں گے اور اپنے تین ممالک کے دورہ یورپ کے آخری دن فرانس کے صدر ایمانویل میکرون سے ملاقات کریں گے۔ دوسری ہند۔نارڈک چوٹی کانفرنس کے دوران، وزیر اعظم مودی دیگر نارڈک لیڈروں یعنی آئس لینڈ کے وزیر اعظم کیٹرین جیکبس ڈوٹیر، ناروے کے وزیر اعظم جوناس گہر اسٹور، سویڈن کے وزیر اعظم میگڈیلینا اینڈرسن اور فن لینڈ کے وزیر اعظم سانا مارین کے ساتھ بات چیت بھی کریں گے۔ وزیراعظم مودی نے اپنے جاری یوروپ کے دورے کے دوران روانگی کے بیان میں کہا کہ چوٹی کانفرنس میں کورونا وباکے بعد اقتصادی بحالی، موسمیاتی تبدیلی، اختراعات اور ٹیکنالوجی، قابل تجدید توانائی، عالمی سلامتی کے منظر نامے کی ترقی اور آرکٹک خطے میں ہندوستان۔نارڈک تعاون جیسے موضوعات پر توجہ مرکوز کی جائے گی۔قابل ذکرہے کہ پہلی ہند۔نارڈک سمٹ 2018 میں اسٹاک ہوم میں منعقد ہوئی تھی۔ مودی نے کہا کہ دوسری ہندوستان۔نارڈک چوٹی کانفرنس میں وہ 2018 میں پہلی ہندوستان۔نارڈک چوٹی کانفرنس کے بعد سے ڈنمارک، آئس لینڈ، فن لینڈ، سویڈن اور ناروے کے وزرائے اعظم کے ساتھ تعاون کا جائزہ لیں گے ۔ انہوں نے کہا کہ وہ سمٹ کے دوران نورڈک ممالک کے لیڈروں کے ساتھ ہندوستان کے دو طرفہ تعلقات میں پیش رفت کا جائزہ لیں گے ۔مودی نے کہا کہ نارڈک ملک ہندوستان کے لئے پائیداری، قابل تجدید توانائی، ڈیجیٹلائزیشن اور اختراع میں اہم شراکت دار ہیں۔بعد ازاں اپنے واپسی کے دورے پر مودی پیرس میں مختصر قیام کریں گے اور فرانس کے صدر ایمانویل میکرون سے ملاقات کریں گے ۔ انہوں نے کہا کہ اپنے واپسی کے دورے کے دوران، میں اپنے دوست صدر میکرون سے ملنے کے لیے پیرس میں رکوں گا۔