گاندھی نگر، 27 مئی (یو این آئی) وزیر اعظم نریندر مودی نے منگل کو گجرات کے گاندھی نگر میں ایک عظیم الشان روڈ شو کیا۔ مودی نے آج صبح ایک شاندار روڈ شو میں کھلی جیپ سے لوگوں کا استقبال کیا۔ اس دوران گورنر ہاؤس سے مہاتما مندر تک ایک بہت بڑا ہجوم جمع ہوا اور پھولوں کی پتیاں نچھاور کر کے ان کا استقبال کیا۔ روڈ شو میں ہزاروں افراد بشمول بچے ، بوڑھے اور خواتین سڑک کے کنارے کھڑے ترنگا لہراتے اور مودی-مودی اور بھارت ماتا کی جے کے نعرے لگاتے نظر آئے ۔ واضح رہے کہ وزیر اعظم گجرات کے دو روزہ دورے پر ہیں۔
مودی کے ہاتھوں 5536 کروڑ کے منصوبوں کا افتتاح
گاندھی نگر، 27 مئی (یو این آئی) وزیر اعظم نریندر مودی نے منگل کے روز گجرات کے گاندھی نگر میں 5536 کروڑ روپے کے منصوبوں کا افتتاح کیا اور سنگ بنیاد رکھا۔مودی نے گجرات کے اپنے دو روزہ دورے کے دوسرے دن آج گاندھی نگر میں روڈ شو کے بعد مہاتما مندر میں منعقدہ خصوصی تقریب میں 5536 کروڑ روپے کے مختلف محکموں کے ترقیاتی منصوبوں کا افتتاح کیا اور سنگ بنیاد رکھا۔ اس میں اربن ڈیولپمنٹ ڈپارٹمنٹ کے 2700 کروڑ روپے سے زائد کے منصوبے شامل ہیں۔ انہوں نے پردھان منتری آواس یوجنا کے تحت 22,000 روپے کی لاگت سے تعمیر کیے گئے مکانات کا افتتاح کیا۔ 1006 کروڑ روپے کی لاگت سے سورت میں کنکرا خلیج کے ساتھ بنجر زمین کو زندہ کرکے ایک بائیو ڈائیورسٹی پارک بنایا گیا ہے ۔
مودی کا 29مئی کو دورہ ٔسکم
گنگٹوک، 27مئی (یو این آئی) وزیراعظم نریندر مودی 29 مئی کو سکم کا دورہ کریں گے اور ریاست کے 50 ویں یوم تاسیس کے موقع پر ہونے والی تقریبات میں شرکت کریں گے ۔سکم کا ریاستی دن 16 مئی کو منایا جاتا ہے ۔ مودی اس موقع پر گنگٹوک جانے والے تھے ، لیکن 22 اپریل کو پہلگام میں دہشت گردانہ حملے اور اس کے بعد پاکستان کے حمایت یافتہ دہشت گرد گروپوں کے خلاف ‘آپریشن سندور’ کے پیش نظر ان کا دورہ 29 مئی کیلئے ملتوی کر دیا گیا تھا۔سال 1975 میں سکم ایک ریفرنڈم کے ذریعے ہندوستانی یونین میں ضم ہوگیا تھا اور ہندوستان کی 22ویں ریاست بن گیا تھا۔ مرحوم قاضی لینڈوپ دورجی سکم کے انضمام کے اہم معمار تھے اور جب یہ ہندوستانی یونین کا حصہ بنا تو وہ اس کے پہلے وزیر اعلیٰ بنے تھے۔ وہ چوگیال بادشاہت کے دوران 1974 سے 1975 تک سکم کے پہلے وزیر اعظم بھی رہے تھے ۔