سری نگر: مرکزی وزیر داخلہ امیت شاہ 9جنوری کو جموں وکشمیر کے دورے پر آرہے ہیں جس میں وہ سیکورٹی منظر نامے کا ایک اعلیٰ سطحی میٹنگ میں جائزہ لیں گے ۔ اس دورہ کے موقع پر وزیر داخلہ اگلی چوکیوں کا بھی دورہ کریں گے ۔ دورے کے پیش نظر جموں وکشمیر میں سیکورٹی انتظامات کئے گئے ہیں۔ اطلاعات کے مطابق وزیر داخلہ امیت شاہ 9جنوری کو جموں وکشمیر کے دورے پر آرہے ہیں۔ ذرائع کے مطابق وزیر داخلہ جموں میں مرکزی زیر انتظام علاقہ کی سیکورٹی صورتحال کا ایک میٹنگ میں جائزہ لیں گے جبکہ وہ جموں وکشمیر کے لیفٹیننٹ گورنر منوج سنہا سے ملاقات کرینگے ۔ وزیر داخلہ دورہ پر بی جے پی مقامی لیڈروں کے ساتھ بھی میٹنگ کریں گے جس میں آئندہ پارلیمانی چناو پر بھی لیڈروں کو ٹاسک دیا جائے گا۔ ذرائع کے مطابق پونچھ اور راجوری میں دہشت گرد سرگرمیوں میں اضافہ کے بیچ وزیر داخلہ کا جموں وکشمیر کا دورہ غیر معمولی اہمیت کا حامل ہے ۔ بتادیں کہ راجوری اور پونچھ اضلاع میں پچھلے کچھ ماہ میں دہشت گرد سرگرمیوں میں غیر معمولی اضافہ ہواہے ۔ ذرائع کا کہنا ہے کہ امیت شاہ دورہ میں راجوری اور پونچھ اضلاع میں سرگرم ملی ٹینٹوں کے خلاف چلائے جارہے آپریشن کے بارے میں آگاہی حاصل کریں گے ۔ یہاں یہ امر قابل ذکر ہے کہ بھارتیہ جنتاپارٹی کے قومی صدر جے پی نڈا اتوار کو ایک روزہ دورے پر جموں وارد ہو رہے ہیں۔
