نئی دہلی، 29 جولائی (یو این آئی) سپریم کورٹ نے منگل کے روز زبانی طور پردوبارہ کہا ہے کہ اگر بہار میں خصوصی نظرثانی کے عمل کے دوران 65 لاکھ ووٹروں کو ووٹر لسٹ سے باہر کیا گیا تو عدالت اس معاملے میں مداخلت کرے گی۔ جسٹس سوریہ کانت اور جسٹس جوی مالیا باگچی کی بینچ نے یہ یقین دہانی ایسوسی ایشن فار ڈیموکریٹک ریفارمز کی جانب سے پیش ہوئے وکیل پرشانت بھوشن کے خدشات پر دی ہے ۔ بینچ کے سامنے وکیل پرشانت بھوشن نے الیکشن کمیشن کے اس بیان کا حوالہ دیا کہ 65 لاکھ افراد نے نظرثانی کے عمل کے دوران اندراج فارم جمع نہیں کروایا۔ مسٹر بھوشن نے کہا کہ اس وجہ سے ان ووٹروں کے حق رائے دہی سے محروم ہونے کا اندیشہ ہے ۔ سپریم کورٹ ان درخواستوں پر 12 اور 13 اگست کو دوبارہ سماعت کرے گی جن میں بہار کے خصوصی نظرثانی کے عمل کو چیلنج کیا گیا ہے ۔
