مودی حکومت کو مداخلت کرناچاہئے ، تمام شہریوں کیلئے یکساں قیمت منصفانہ
نئی دہلی: کانگریس کی صدر سونیا گاندھی نے آج وزیر اعظم نریندر مودی کو کورونا ویکسین کی قیمتوں میں فرق سے متعلق ایک خط لکھا ، جس میں کہا گیا کہ وباء کے درمیان ویکسین کی من مانی قیمت غیر منصفانہ ہے اور مودی حکومت کو اس میں مداخلت کرنی چاہئے۔ کانگریس پارلیمانی پارٹی کی لیڈرنے اس بات پر تشویش کا اظہار کیا کہ کورونا ویکسینیشن سے متعلق حکومت کی پالیسیوں کی وجہ سے ویکسین بنانے والی کمپنیاں اس کی قیمتوں سے متعلق من مانی پر اُتر آئی ہیں۔انہوں نے کہا کہ ویکسین تیار کرنے والی کمپنی سیرم انسٹی ٹیوٹ نے آج ہی اس ویکسین کی قیمت کا اعلان کیا ہے ۔ اس کے مطابق مرکزی حکومت کو یہ ٹیکہ 150 روپے میں ، ریاستی سرکاروں کو 400 روپے میں اور خانگی اسپتالوں کو 600 روپے میں فروخت کیاجائے گا۔صدرکانگریس نے کہا کہ جب ملک میں کورونا کی دوسری لہر عروج پر ہے تو حکومت کو اس طرح کی من مانی کی اجازت نہیں دینی چاہئے اور 18 سال سے زیادہ عمر کے تمام افراد کو ان کی معاشی حیثیت یادیگر سطح کا اندازہ کئے بغیر یکساں طور پر سبھی کیلئے ٹیکہ اندازی کا انتظام کرنا چاہئے ۔