ممبئی، 9 اگست (یو این آئی) جنوبی ہند کی اداکارہ رکمنی وسنت نے فلم ٹاکسک :اے فیری ٹیل فار گرون اَپس’میں راکنگ اسٹار یش کے ساتھ کام کرنے کے تجربے کو یاد کرتے ہوئے کہا کہ یش نے انہیں صرف شریک اداکارہ نہیں بلکہ ایک مضبوط ساتھی کے طور پرکام کرنے کا موقع دیا، جس کا اثر ہمیشہ ان کے دل میں رہے گا۔ بہت زیادہ انتظارکی جانے والی فلم ٹاکسک: اے فیری ٹیل فارگرون اَپس کا ٹریلر ایک شاندار تقریب میں جاری کیا گیا۔ ٹریلر میں ناظرین کو فلم کی ہائی آکٹین دنیا کی جھلک دیکھنے کو ملی، جس میں ایکشن، جرم، رومانس اور دھوکے کا زبردست امتزاج نظر آتا ہے ۔ فلم کی ہدایت کارگیتو موہن داس اور راکنگ اسٹار یش کی موجودگی میں رکمنی وسنت کی جذباتی گفتگو نے تقریب میں خاص توجہ حاصل کی۔ فلم میں پراسرار میلیسا کا کردار ادا کر رہیں رکمنی نے اسٹیج پر ہدایت کارگیتو موہن داس کا شکریہ ادا کیا۔ انہوں نے کہا کہ گیتو نے انہیں پیچیدہ کردارکو سمجھنے اور ایک اداکارہ کی حیثیت سے اپنی صلاحیتوں کی حدود کو آگے بڑھانے میں مدد دی۔ رکمنی نے کہا میں گیتو موہن داس کا شکریہ ادا کرنا چاہوں گی، جو ایک بے مثال ہدایت کار ہیں۔ اس فلم اور اس پیچیدہ کردارکے دوران میرا ہاتھ تھامے رکھنے کے لیے شکریہ۔کبھی ہار نہ ماننے کے لیے شکریہ۔ آپ نے مجھے ہمیشہ مزید آگے بڑھنے کی ترغیب دی اور مجھ سے مزید محنت کا تقاضا کیا۔ میں نے بہت کچھ سیکھا ہے اور میں بے حد شکر گزار ہوں۔”فلم کے ٹریلر میں رکمنی بالکل مختلف اور متاثر کن روپ میں نظر آ رہی ہیں۔ اپنے معمول کے انداز سے ہٹ کر وہ میلیسا کے کردار میں ایک تیز اور پراسرار انداز پیش کرتی دکھائی دیتی ہیں۔ ان کا کردار جرم، رومانس اور دھوکے کی دنیا سے گہرائی سے جڑا ہوا نظر آتا ہے ۔’ٹاکسک: اے فیری ٹیل فار گرون اَپس’ 26 اگست 2026 کو دنیا بھر میں ریلیز ہونے کے لیے تیار ہے ۔ فلم میں رکمنی وسنت میلیسا کے کردار میں ایک بالکل مختلف انداز میں نظر آئیں گی۔ اس کے علاوہ وہ جلد ہی این ٹی آر جونیئر کے ساتھ آنے والی فلم ‘ڈریگن’ میں بھی دکھائی دیں گی۔
