نیویارک ؍ اسلام آباد : انسانی حقوق کی عالمی تنظیم ایمنسٹی انٹرنیشنل نے حکومت پاکستان سے جبری گمشدگیوں کو قانوناً جرم قرار دینے کا مطالبہ کیا ہے۔ ایمنسٹی کے مطابق جبری گمشدگی ’دہشت گردی کا ایک طریقہ‘ ہے۔انسانی حقوق کی بین الاقوامی تنظیم نے زور دیا کہ وہ اپنا وعدہ پورا کرے اور جبری گمشدگیوں کو قانوناً جرم قرار دے۔ ایمنسٹی کے مطابق جبری طور پر غائب کیے جانے والوں کو تشدد اور یہاں تک کہ موت کا خطرہ بھی لاحق ہے۔ اس کے علاہ رہائی کے بعد یہ افراد جسمانی اور نفسیاتی صدمے کا شکار رہتے ہیں۔ایمنسٹی انٹرنیشنل کے مطابق پاکستانی وزارت دفاع نے اعتراف کیا ہے کہ کچھ عرصہ قبل لاپتہ ہونے والے انسانی حقوق کا کارکن ادریس خٹک ملکی خفیہ ایجنسی کی تحویل میں ہیں۔ایمنسٹی کی جانب سے جاری کیے گئے ایک بیان میں بتایا گیا کہ 56سالہ ادریس خٹک گزشتہ برس نومبر میں خیبر پختوخواہ سے لاپتہ ہوا تھا۔ وہ ایمنسٹی انٹرنیشنل اور انسانی حقوق کی دیگر بین الاقوامی غیر سرکاری تنظیموں کے ساتھ مشیر کی حیثیت سے کام کر چکے ہیں۔ وہ کئی سالوں سے خیبر پختونخواہ اور سابقہ وفاقی زیر انتظام قبائلی علاقوں میں انسانی حقوق کی مبینہ پامالیوں کے موضوع پر کام کر رہے تھے۔انسانی حقوق کی اس تنظیم کے مطابق ادریس خٹک پر کوئی الزام عائد نہیں کیا گیا اور نہ ہی اس کو عدالت میں کسی مقدمے کا سامنا کرنے کا موقع دیا گیا۔ پاکستان میں حالیہ برسوں کے دوران ہزاروں افراد لاپتہ ہوئے، جن میں انسانی حقوق کے کارکنان، نسلی اور مذہبی اقلیتی گروپوں کے ممبران اور ملک کی طاقتور فوج کے ناقدین شامل ہیں۔ایمنسٹی نے ایک بیان میں کہاکہ پاکستان میں، جبری گمشدگی کو فوج کی پالیسیوں پر اختلاف رائے اور تنقید کرنے والوں کے خلاف استعمال کیا جاتا ہے۔ انسانی حقوق کی تنظیم نے مزید کہا کہ جبری گمشدگی دہشت گردی کا ایک طریقہ کار ہے جو صرف فرد واحد کو نہیں بلکہ اس کے اہل خانہ اور معاشرے کو متاثر کرتا ہے۔
