ریاض : پاکستان کی سب سے بڑی آئی ٹی کمپنی’’سسٹمز‘‘ نے سعودی عرب کے دارالحکومت ریاض میں اپنا علاقائی ہیڈ کوارٹر قائم کیا ہے۔ کمپنی سسٹمز عربیہ کے نام سے سعودی عرب میں مختلف کاروباری اداروں کو سافٹ ویئر سے منسلک حل اور منظم خدمات فراہم کرے گی۔سسٹمز عربیہ نے ایک بیان میں کہا کہ اسے مواصلات، بینکاری اور سرکاری شعبوں میں بڑے کاروباری اداروں اور صارفین کی جانب سے زبردست پذیرائی ملی ہے۔ٹیمینوس کی ایوارڈ یافتہ شراکت دار کمپنی این ڈی سی ٹیک کے حصول کے بعد سسٹمز گروپ منفرد طور پر ڈیجیٹل بینکوں، فن ٹیک کمپنیوں، اور ادائیگی کی خدمات فراہم کرنے والے اداروں کی ڈیجیٹل ضروریات کو پورا کرنے میں کامیاب ہو گئی ہے۔”گذشتہ دو سالوں سے ہم نے کئی اہم اقتصادی اشاریوں، حکومت کے وڑن، اور مملکت کی ترقی کی صلاحیت پر گہری نظر رکھی ہے اور ہمیں اس سے بہت امید ملی ہے۔ سعودی عرب میں کام کرنے کے لیے ہم بہت پرجوش ہیں، اور ہم ویڑن 2030 کے لیے فعال کردار ادا کرنے کے منتظر ہیں۔” سسٹمز عربیہ کے جنرل منیجر راؤ حامد نے ایک بیان میں کہا۔
