ممبئی (ایجنسیز) 12 ستمبر کو اسپائس جیٹ کا Q400 طیارہ کنڈلا سے ممبئی کیلئے روانہ ہوا، تاہم پرواز کے دوران ایک بڑا سانحہ ہونے سے بچ گیا۔ طیارے کا ایک بیرونی پہیہ ٹیک آف کے فوراً بعد رن وے پر پایا گیا، جس سے طیارے میں تکنیکی خرابی کا پتہ چلا۔پائلٹس نے فوری اور سنجیدہ فیصلہ کرکے پرواز جاری رکھی اور ممبئی کے چھترپتی شیواجی بین الاقوامی ہوائی اڈے پر ہنگامی لینڈنگ کی۔ طیارہ بحفاظت رن وے 27 پر اترا اور تمام مسافر و عملہ محفوظ رہے ۔ CSMIA ترجمان کے مطابق، سہ پہر 3:51 بجے تکنیکی خرابی کی اطلاع ملنے پر ایمرجنسی نافذ کر دی گئی تھی۔ کچھ دیر بعد معمول کی پروازیں بحال کر دی گئیں۔اسپائس جیٹ اور متعلقہ حکام نے واقعے کی تحقیقات شروع کر دی ہیں تاکہ مستقبل میں ایسے حادثات سے بچا جا سکے۔
