کلکتہ13 جنوری(سیاست ڈاٹ کام) پریسیڈنسی یونیورسٹی میں شعبہ سیاسیات کی ایک طالبہ نے اپنے پروفیسر کے خلاف جنسی زیادتی کے شکایت کی ہے ۔ یونیورسٹی کی انٹرنل کمپلین کمیٹی نے سینئر پروفیسر کے خلاف جانچ شروع کر دی ہے ۔تاہم پروفیسر نے الزامات کورد کرتے ہوئے کہا کہ ان کو بد نام کرنے کے لیے یہ سازش کی جارہی ہے ۔بیس سالہ طالبہ نے 12 دسمبر کو تحریری شکایت کرتے ہوئے الزام لگایا تھا کہ گزشتہ ڈیڑھ سال سے پرفیسر انہیں پریشان کررہے ہیں۔ کل طالبہ نے اپنے فیس بک اکاؤنٹ پر بھی اس پورے معاملے کو پوسٹ کیا تھا۔اس پوسٹ کو60 مرتبہ شیئر کیاگیا۔ کئی مزید طالبات نے بھی پروفیسر کے خلاف شکایت کی ہے کہ انہیں اس طرح کی صورت حال کا سامنا کرنا پڑا ہے ۔یہ معاملہ سامنے آنے کے بعد فرسٹ ائیر اور سیکنڈائیر کے طلباء نے کلاس کا بائیکاٹ شروع کردیا ہے ۔پروفیسر نے اپنے بچاؤ میں کہا ہے کہ چوں کہ وہ ترمیمی ایکٹ کی حمایت کرتے ہیں اسلئے بی جے پی مخالف طلبہ وطالبات نے ان کے خلاف سازش رچی ہے اور یہ مجھے سبق سکھانے کی کوشش ہے ۔ پروفیسر نے کہا ہے یہ پورا معاملہ سیاسی ہے ۔
