سداپور میں ڈمپنگ یارڈ کیلئے افسران آئیں تو ٹانگیں توڑ دیں ، آئینی عہدوں پر فائز شخص کی دھمکیوں اور
نامناسب تبصرے پر مختلف حلقوں کی طرف سے سخت تنقیدیں
شادنگر ۔یکم اکٹوبر ( سیاست ڈسٹرکٹ نیوز ) رنگاریڈی ضلع کے کتور منڈل کے سِدّاپور گاؤں میں مجوزہ ڈمپنگ یارڈ کے قیام کے منصوبہ کو کسی بھی صورت میں مکمل ہونے نہیں دیا جائے گا، قومی ایس ٹی کمیشن کے رکن جاتوت حسین نائک نے یہ واضح کیا۔ جمعرات کو رنگاریڈی ضلع کے شادنگر اسمبلی حلقہ، کتور منڈل کے سِدّاپور علاقے میں مقامی افراد اور قبائلیوں کے ساتھ منعقدہ عوامی اجلاس سے خطاب کرتے ہوئے انہوں نے حکومت کی پالیسیوں کے ساتھ ساتھ سرکاری مشنری اور میڈیا کے طرزِ عمل پر بھی شدید برہمی کا اظہار کیا۔انہوں نے شدید تنقید کرتے ہوئے کہا کہ میڈیا عوامی مسائل کو نمایاں نہیں کر رہا ہے۔ انہوں نے کہا، “حکومتوں کی جانب سے دی جانے والی رقم کے آگے میڈیا سرنڈر ہو چکا ہے۔ حکمران جماعتوں کی بدنامی نہ ہو، اس لیے یہاں کے عوامی احتجاج کو کوریج دیے بغیر مائیک اور کیمرے اٹھانے والا میڈیا مینیج ہو چکا ہے۔”انہوں نے الزام عائد کیا کہ جو بھی حکومت اقتدار میں آتی ہے، یہ میڈیا اسی کی خدمت میں لگ جاتا ہے۔ انہوں نے کہا کہ ایسے مین اسٹریم میڈیا کے مقابلے میں ہر فرد کے ہاتھ میں موجود سیل فون کا استعمال کیا جائے۔ سوشل میڈیا زیادہ طاقتور ہے اور بے باک میڈیا کا کردار ادا کر سکتا ہے۔پولیس اور دیگر افسران کے رویہ پر قومی ایس ٹی کمیشن کے رکن جاتوت حسین نائک نے سخت تبصرے کیے۔ انہوں نے سوال کیا، “میڈیا کو کوریج کرنے سے روکنا ہی کیا پولیس کا کام ہے ؟” انہوں نے کہا کہ عوام کی زمینوں کی حفاظت کرنے والے بعض لیڈر اور افسران بھیڑیوں اور بڑے چوروں کی طرح بن کر لوٹ مار کر رہے ہیں اور پولیس ان کا ساتھ دے رہی ہے۔ انہوں نے انتباہ دیتے ہوئے کہا، “اگر ہمارے قبائلی اور غریب بچوں کو دھمکایا گیا یا ان پر زیادتی کی گئی تو ہم سخت جواب دیں گے۔ اگر ڈمپنگ یارڈ کے کام کے لیے پولیس یا افسران یہاں آئیں تو ان کی ٹانگیں توڑ دیں، اس کے بعد معاملہ کو میں دہلی سے دیکھ لوں گا۔” انہوں نے مزید کہا کہ ان کا ادارہ آئینی اختیارات رکھنے والا قومی کمیشن ہے اور مقامی پولیس کے اعلیٰ افسران اور ریونیو افسران کو ہر ماہ دو مرتبہ دہلی کی عدالت میں طلب کرکے کٹہرے میں کھڑا کیا جائے گا۔ انہوں نے الزام لگایا کہ ماضی میں جواہر نگر میں ڈمپنگ یارڈ قائم کرنے سے تقریباً 50 کلومیٹر کے علاقے میں زیرِ زمین پانی آلودہ ہوا اور اب سِدّاپور میں بھی اسی طرح کے حالات پیدا کرکے ہزاروں ایکڑ قیمتی اراضی حاصل کرنے کی کوشش کی جا رہی ہے۔انہوں نے مزید الزام لگایا کہ ہائیڈرا، 22A قوانین اور TDR کے نام پر رئیل اسٹیٹ تاجروں اور عام لوگوں کو شدید مشکلات سے دوچار کیا جا رہا ہے۔ انہوں نے عوام سے اپیل کی کہ ان مبینہ بے ضابطگیوں کے خلاف متعلقہ GO منسوخ ہونے تک جدوجہد جاری رکھیں۔ انہوں نے کہا کہ متاثرہ افراد میں سے کوئی بھی آن لائن کمیشن کے پورٹل پر شکایت درج کرے تو فوری کارروائی کی جائے گی۔انہوں نے کہا کہ اس معاملے میں مقامی رکن اسمبلی کو اپنے ضمیر کے مطابق موقف اختیار کرنا چاہیے۔ سابق رکن اسمبلی کو بھی مخاطب کرتے ہوئے انہوں نے حکمراں اور اپوزیشن جماعتوں کو اس معاملے کا ذمہ دار ٹھہرانے کی کوشش کی۔واضح رہے کہ آئینی عہدہ پر فائز ہوکر پولیس اور میڈیا کے خلاف نامناسب تبصرے کرنے پر قومی ایس ٹی کمیشن کے رکن جاتوت حسین نائک پر شدید تنقید کی جا رہی ہے اور جمہوریت پسند حلقوں میں تشویش اور غم و غصہ کا اظہار کیا جا رہا ہے۔میڈیا حلقوں نے کہا کہ جمہوریت کے چوتھا ستون سمجھا جانے والے صحافتی شعبہ کے بارے میں کیے گئے تبصرے انتہائی غیر ذمہ دارانہ ہیں۔ صحافیوں اور نیوز چینلز کو نشانہ بناتے ہوئے “میڈیا بک چکا ہے، میڈیا والوں کو پیسے دیے گئے ہیں، میڈیا حکومتوں کا غلام بن گیا ہے” جیسے الزامات عائد کیے جانے پر شدید اعتراض کیا جا رہا ہے۔ صحافتی حلقوں نے کہا کہ سِدّاپور ڈمپنگ یارڈ کے مسئلے پر ابتدا ہی سے میڈیا نے مختلف سطحوں پر خبریں نشر اور شائع کی ہیں۔ میڈیا اداروں کی ساکھ کو نقصان پہنچانے والی غلط تشہیر کرنا ان کے عہدے کے شایانِ شان نہیں ہے۔”اگر ڈمپنگ یارڈ کے کام کے لیے پولیس یا افسران آئیں تو ٹانگیں توڑ دیں، بعد میں میں دیکھ لوں گا” جیسے الفاظ کے ذریعہ عوام کو قانون اپنے ہاتھ میں لینے کے لیے اکسانا آئینی روح کے مطابق کیسے ہو سکتا ہے، یہ سوال افسران کی جانب سے اٹھایا جا رہا ہے۔افسران کو ’چوکیدار کتوں‘ سے تشبیہ دینے اور فرائض انجام دینے والے سرکاری اہلکاروں کے خلاف جسمانی حملوں کی ترغیب دینے والے اندازِ بیان پر بھی سوالات اٹھائے جا رہے ہیں ۔تعلیم یافتہ کئی افراد نے مطالبہ کیا کہ اظہارِ رائے کی آزادی کے نام پر اداروں کو کمزور کرنے والے ان بیانات کو فوری طور پر واپس لیا جائے اور متعلقہ رکن معذرت خواہی کریں۔اس پروگرام میں شادنگر آر ڈی او سَرِیتا، کتور ایم آر او، بی جے پی رہنما شری وردھن ریڈی، اندے بابیا، سابق رکن اسمبلی انجیا یادو، سِدّاپور ڈمپنگ یارڈ مخالف تحریک کے رہنما ایم اے ستیہ نارائن، رامبل نائک، مِٹّو نائک، پناپاکا پربھاکر، سرینواس ریڈی، بالیا، شیکھر ریڈی، پربھاکر، سِدّاپور کے سرپنچ بسّو نائک، وائی ایم تانڈہ کے سرپنچ گووند نائک، رنجیت، راجندر ریڈی، بَتیا نائک، ناگیش نائک سمیت مختلف سیاسی جماعتوں اور عوامی تنظیموں کے رہنماؤں نے شرکت کی۔
