سرینگر، 30 جون (یو این آئی) پیپلز ڈیموکریٹک پارٹی (پی ڈی پی) کی صدر محبوبہ مفتی نے منگل کو الزام لگایا کہ کشمیر وادی بھر میں پارٹی کے متعدد رہنماؤں اور کارکنوں کو سرکاری ملازمتوں کی آؤٹ سورسنگ کے خلاف پرامن احتجاج روکنے کیلئے گھروں میں نظر بند کر دیا گیا۔ محبوبہ مفتی نے سوشل میڈیا پلیٹ فارم ایکس پر ایک پوسٹ میں الزام لگایا کہ نیشنل کانفرنس (این سی) کی زیر قیادت حکومت جوابدہی کے سوال پر یہ کہہ کر اپنی ذمہ داری سے بچتی ہے کہ پولیس اس کے اختیار میں نہیں، لیکن جب نوجوان اپنے مطالبات کے حق میں پرامن آواز بلند کرتے ہیں تو یہی حکومت پولیس کے ساتھ مل کر احتجاج کو دبانے میں سرگرم ہو جاتی ہے ۔ انہوں نے کہا کہ ریزرویشن کے نظام میں اصلاحات کا مطالبہ ہو یا بیک ڈور تقرریوں کے خلاف احتجاج، حکومت ہر جمہوری آواز کو دبانے کیلئے پولیس کے ساتھ مکمل تال میل کے ساتھ کام کرتی ہے ۔ محبوبہ مفتی نے الزام لگایا کہ حکومت کی “دوہری پالیسی” اس وقت پوری طرح بے نقاب ہو گئی جب وادی بھر میں پی ڈی پی کے رہنماؤں اور کارکنوں کو مبینہ طور پر گھروں میں نظر بند کر دیا گیا۔
