حیدرآباد ۔21 ۔ فروری (پریس نوٹ) مرکزی رویت ہلال کمیٹی صدر مجلس علماء دکن کا ماہانہ اجلاس بضمن رویت ہلال ماہِ شعبان المعظم 1444 ھ زیر نگرانی مولانا سید محمد قبول پاشاہ قادری الشطاری معتمد صدر مجلس علماء دکن آج شام خانقاہ کامل مرکزی آستانہ شطاریہ دبیر پورہ میں منعقد ہوا۔ شہر حیدرآباد میں چاند نظر آگیا۔ علاوہ ازیں رویت ہلال کمیٹی گلبرگہ شریف، ورنگل ، دہلی ، پٹنہ ، بنارس، فرنگی محل ، چینائی ، بنگلور ، لکھنو ، الہ آباد ، کلکتہ سے عام رویت کی اطلاعات ملیں۔ لہذا تحت احکامِ شرعیہ مرکزی رویت ہلال کمیٹی صدر مجلس علماء دکن اعلان کرتی ہے کہ بتاریخ 22 فروری 2023 ء بروز چہارشنبہ کو یکم شعبان المعظم 1444 ھ ہوگی ۔ اس اجلاس میں مولانا سید محمد قبول باشاہ قادری الشطاری ، مولانا مفتی خلیل احمد ، مولانا سید محمود پاشاہ قادری ، مولانا سید صغیر احمد ، مولانا سید شیخین احمد شطاری کامل پاشاہ ،مولانا سید ال مصطفی قادری الموسوی، مولانا محمد مشہود احمد اور قاضی سید نوراللہ فاروق عارفی نے شرکت کی ۔
چاند نظر آگیا، شیعہ علماء کا بیان
حیدرآباد۔ 21 ۔ فروری(پریس نوٹ) سید علی اصغر جعفری کی اطلاع کے مطابق کل ہند شیعہ مجلس علماء و ذاکرین نے یہ اعلان کیا ہے کہ شہر حیدرآباد میں چاند نظر آگیا۔ لہذا 22 فروری 2023 ء چہارشنبہ کو یکم شعبان المعظم 1444 ھ ہوگی ۔ اس کی تصدیق حسب ذیل علماء کرام نے کی ہے۔ مولانا سید نبی حسن زیدی، مولانا ڈاکٹر سید نثار حسین حیدر آقا، مولانا رضا عباس خاں، مولانا سید جواد عابدی، مولانا سید محب عابد۔
