چھتیس گڑھ : سیکوریٹی فورسز نے چھتیس گڑھ میں ایک بڑی کامیابی حاصل کرتے ہوئے جمعہ کے روز چار نکسلائیٹس کو ہتھیار ڈالنے پر مجبور کر دیا، جن میں ایک دو لاکھ روپے انعام یافتہ خاتون نکسلائٹ بھی شامل ہے۔ اس کے علاوہ، گاریابند کے جنگلات میں نکسلائیٹس کے خفیہ اڈہ کا بھی انکشاف ہوا جہاں سے لاکھوں روپے نقدی اور دھماکہ خیز مواد برآمد کیا گیا۔ پولیس حکام کے مطابق سکما میں چار نکسلائیٹس، جن میں ایک دو لاکھ روپے انعام یافتہ خاتون بھی شامل ہے، نے سیکوریٹی فورسز کے سامنے ہتھیار ڈال دیے۔ سرینڈر کرنے والے نکسلائیٹس میں کلما آیاٹے (35)، نپو راگھو (27)، مدکم کوڑا (22) اور سوڈی لاچا (27) شامل ہیں۔ کلما آیاٹے ‘انقلابی قبائلی خواتین تنظیم’ کی صدر تھی اور اس پر دو لاکھ روپے کا انعام تھا۔ حکام کے مطابق ان نکسلائیٹس نے چھتیس گڑھ حکومت کی نکسل ازم خاتمہ اور بحالی پالیسی سے متاثر ہو کر ہتھیار ڈالے ہیں۔ وہ نکسلائیٹس کی بے بنیاد نظریات، استحصال اور غیر انسانی سلوک سے تنگ آچکے تھے۔ حکومت کی پالیسی کے تحت خودسپرد کرنے والے نکسلائیٹس کو مالی و سماجی مدد فراہم کی جائے گی۔دوسری جانب گاریابند ضلع میں سیکوریٹی فورسز نے نکسلائیٹس کا خفیہ خزانہ برآمد کیا، جس میں آٹھ لاکھ روپے نقدی اور دھماکہ خیز مواد شامل تھا۔ پولیس حکام کے مطابق، جمعرات کو مخبر کی اطلاع پر سیکوریٹی فورسز نے پانڈری پانی گاؤں کے جنگل میں سرچ آپریشن کیا۔ اس دوران ایک درخت کے نیچے مشتبہ جگہ کھودنے پر سفید تھیلے میں بند ایک فولادی ڈبہ ملا، جس میں آٹھ لاکھ روپے نقد، 13 جلنے والے جلیٹن بم، نکسلائیٹ بینرز، ڈائریاں اور نکسلائیٹ لٹریچر موجود تھا۔
