نئی دہلی: 14ویں ہندوستان۔روس دو طرفہ بحری مشق ‘اندرا’، جسے ہندوستان اور روس کے درمیان پائیدار بحری شراکت داری کا سنگ بنیاد سمجھا جاتا ہے ، جمعہ کو چنئی میں شروع ہوا۔یہ مشق 2003 میں شروع ہوئی تھی اور اسے دونوں بحری افواج کے درمیان طویل مدتی تزویراتی تعلقات اور تعاون کی علامت سمجھا جاتا ہے ۔یہ مشق دو مرحلوں میں بندرگاہ کا مرحلہ 28 سے 30 مارچ تک چنئی میں اور سمندری مرحلہ 31 مارچ سے 2 اپریل تک خلیج بنگال میں منعقد کی جا رہی ہے ۔مشق میں روسی بحریہ کے فریگیٹس پیچنگا، ریزکی اور الدار سیڈینزاپوف کے ساتھ ساتھ ہندوستانی بحریہ کے بحری جہاز رانا، کتھار اور میری ٹائم پٹرولنگ ایئر کرافٹ P8I بھی حصہ لیں گے ۔بندرگاہ کے مرحلے میں دونوں بحری افواج کے اہلکاروں کے درمیان افتتاحی تقاریب، سبجیکٹ ایکسپرٹ ایکسچینج (ایس ایم ای ای)، باہمی دورے ، کھیلوں کی تقریبات اور پری سیل بریفنگ شامل ہوں گی۔
