بیجنگ۔ 14 مارچ ۔ ( سیاست ڈاٹ کام ) چین میں مہلک کورونا وائرس سے مرنے والوں کی تعداد بڑھ کر 3189 ہو گئی جبکہ 80،824 لوگ اس وائرس سے متاثر ہیں اور 65،541 مریضوں کو صحتیاب ہونے کے بعد اسپتال سے فارغ کر دیا ہے ۔ چین کی نیشنل ہیلتھ کمیٹی نے ہفتہ کو یہ اطلاع دی ۔ کمیٹی نے کہا‘‘ نیشنل ہیلتھ کمیٹی کو ملک کے 31 صوبوں سے موصول اطلاعات کے مطابق اب تک تقریباََ 80،824 افراد کے کورونا وائرس سے متاثر ہونے کی تصدیق کی گئی ہے اور تقریباََ 12094 مریضوں کو سخت نگرانی میں رکھا گیا ہے جن میں سے 3610 کی حالت نازک ہے ۔ تقریباََ 65،541 مریضوں کوصحتیاب ہونے کے بعد اسپتال سے فارغ کر دیا گیا ہے ۔ گزشتہ 24 گھنٹوں کے دوران چین میں کورونا وائرس کے 11 نئے معاملے سامنے آئے ہیں ۔واضح ر ہے کہ چین کے صوبہ ہوبئی کے دارالحکومت ووہان سے نمودار ہونے والے جان لیوا کورونا وائرس کی گرفت میں دنیا کے 104 سے زائد ملک آ گئے ہیں اور اس سے مرنے والوں کی تعداد 5410 ہو چکی ہے جبکہ ایک لاکھ سے زائد افراد اس وائرس سے زندگی اور موت کی جنگ لڑ رہے ہیں ۔ عالمی ادارۂ صحت (ڈبلیو ایچ او) نے کورونا وائرس کے بڑھتے ہوئے خطرے کے درمیان بدھ کو اسے عالمی وبا قرار دیا ہے ۔
