پٹنہ: بہار راشٹریہ جنتا دل (آر جے ڈی) کے ترجمان اعجاز احمد نے کہا ہے کہ ڈبل انجن والی حکومت میں نوکری اور روزگار کی بات پوری طرح ختم ہو گئی ہے ۔احمد نے منگل کو کہا کہ بہار میں 20 سال سے ڈبل انجن والی حکومت کام کر رہی ہے ، لیکن اتنی نوکریاں اور روزگار ان 20 سالوں میں نہیں دیے گئے جتنے اپوزیشن لیڈر تیجسوی یادو نے مہا گٹھ بندھن حکومت کے ذریعے 17 ماہ میں دینے کا کام کیا ہے ۔ مہا گٹھ بندھن حکومت نے تقریباً 5.5 لاکھ نوکریاں دی ہیں اور 3.50 لاکھ خالی عہدے تیجسوی چھوڑکر آئے تھے اور ان کو اب تک بھرا نہیں گیا ہے ۔آر جے ڈی کے ترجمان نے کہا کہ بہار حکومت نوجوانوں کی نوکریوں اور روزگار کے ساتھ کھلواڑ کر رہی ہے ، اور کہیں نہ کہیں نوجوانوں کے مستقبل کو کھائی میں لے جانے کی مسلسل کوشش کی جا رہی ہے ، کیونکہ بہار میں نفرت پھیلانے والے لوگ حکومت میں شامل ہیں، جو نوجوانوں کو نوکری اور روزگار دینا نہیں چاہتے ۔
