خلاف ورزی پر جرمانہ اور قید کی سزا‘ پارلیمنٹ میں قانون منظور
اسٹاک ہوم :ڈنمارک کی پارلیمنٹ نے ایک نئے قانون کی منظوری دی ہے جس کے تحت قرآن کو نذرِ آتش کرنے پر پابندی ہوگی۔جمعرات کو منظور کیے گئے قانون کے مطابق ملک میں قرآن کو نذرِ آتش کرنے کا عمل جرم تصور کیا جائے گا۔ حالیہ مہینوں میں ڈنمارک اور سویڈن میں متعدد اسلام مخالف مظاہرے ہوئے تھے جس کے دوران قرآن کی بے حرمتی کی گئی تھی۔جس کے بعد ڈنمارک پر متعدد ممالک کی جانب سے دباؤ ڈالا گیا تھا۔ڈنمارک کے وزیرِ انصاف پیٹر ہومیلجارڈ کے مطابق جولائی سے لے کر اب تک ملک میں 500 سے زائد ایسے مظاہرے ہوئے ہیں جہاں قرآن کی بیحرمتی کی گئی ہے۔ ’ایسے مظاہرے دیگر ممالک کے ساتھ ڈنمارک کے تعلقات، مفادات اور سکیورٹی کو نقصان پہنچا سکتے ہیں۔‘حالیہ دنوں میں ڈنمارک کی جانب سے آزادی اظہارِ رائے اور مذاہب پر ہونے والی تنقید کے حوالے سے توازن رکھنے کی کوششیں دیکھنے میں آئی ہیں کیونکہ قرآن کی بے حرمتی جیسے واقعات کے سبب انتہاپسندوں کے حملوں کے خدشات بڑھ گئے تھے۔ڈنمارک کی پارلیمنٹ میں نئے قانون کے حق میں 94 ووٹ ڈالے گئے جبکہ اس کی مخالفت میں 77 ووٹ ڈالے گئے۔ڈنمارک کی حکومت کے مطابق قانون کی خلاف ورزی کرنے پر جرمانے عائد کیے جائیں گے اور دو سال قید کی سزا بھی سْنائی جا سکتی ہے۔بہر حال مسلم ممالک کے دباؤ کا اثر رنگ لایا۔
