ملکی (کرناٹک) : وزیر اعظم نریندر مودی نے چہارشنبہ کو اپنی انتخابی تقریر ’بجرنگ بلی کی جے‘سے شروع کی اور کانگریس لیڈر سونیا گاندھی اور ان کے خاندان پر سخت حملہ کرتے ہوئے کہا کہ کانگریس کرناٹک میں اقتدار میں آنے کی کوشش کر رہی ہے کیونکہ ایسا اس لیے کر رہی ہے کہ وہ اسے دہلی میں بیٹھے شاہی خاندان کیلئے ’اے ٹی ایم نمبر ون‘بنا سکے ۔ مودی کرناٹک میں ایک انتخابی ریلی سے خطاب کر رہے تھے ۔ انہوں نے کہا کہ ہماری کوشش ہے کہ کرناٹک صنعتی ترقی میں نمبر ون بنے ، ہماری کوشش ہے کہ کرناٹک زراعت کی ترقی، تعلیم اور صحت میں نمبر ون بنے ، لیکن کانگریس کیا چاہتی ہے ، کانگریس کرناٹک کو ‘شاہی خاندان’ دہلی میں بیٹھی سونیا گاندھی اور ان کی فیملی کیلئے اے ٹی ایم نمبر ایک بنانا چاہتی ہے ۔انہوں نے کہا کہ اس کے برعکس بھارتیہ جنتا پارٹی کا عزم کرناٹک کے جدید انفراسٹرکچر کو مضبوط کرنا اور کرناٹک کو ملک میں نمبر ون اور ’مینوفیکچرنگ سوپر پاور‘ بنانا ہے ۔کانگریس کے سینئر لیڈر اور سابق چیف منسٹر سدارامیا کو بالواسطہ نشانہ بناتے ہوئے انہوں نے کہا کہ دوسری طرف کانگریس بی جے پی کے ترقیاتی اقدامات کو ناکام بنانے کیلئے ریٹائرمنٹ کے نام پر ووٹ مانگ رہی ہے ۔ انہوں نے دعویٰ کیا کہ یہ ان کا آخری الیکشن ہوگا۔کانگریس کے سابق صدر راہول گاندھی کے لندن میں ہندوستان کے خلاف ریمارکس پر تنقید کرتے ہوئے مودی نے کہا کہ پوری دنیا ہندوستان میں ترقی اور جمہوریت کی تعریف کررہی ہے ، لیکن کانگریس پوری دنیا میں ملک کو بدنام کررہی ہے ۔
