بنگلورو:کرناٹک اسمبلی انتخابات میں ووٹنگ کا عمل مکمل ہوگی ہے اور 2615 امیدواروں کی قسمت ای وی ایم میں قید ہوگئی ہے۔ ہفتہ کو، نتائج کا اعلان ہوگا اور سب ہی کوبے چینی سے اس کا انتظار ہے۔کرناٹک میں 224 اسمبلی سیٹوں کے لیے ووٹنگ کا عمل انجام پا چکا ہے اور 2615 امیدواروں کی قسمت ای وی ایم میں قید ہو گئی ہے۔ اب سبھی کو 13 مئی کا انتظار ہے جب انتخابی نتیجہ جاری کیا جائے گا۔کل چھوٹے موٹے واقعات کے درمیان بڑی تعداد میں گھروں سے باہر نکل کر ووٹروں نے اپنے حق رائے دہی کا استعمال کیا۔ ریاست میں اہم مقابلہ کانگریس اور بی جے پی امیدواروں کے درمیان ہی ظاہر ہو رہا ہے، جبکہ کچھ سیٹوں پر جے ڈی ایس امیدوار مضبوط دکھائی دے رہے ہیں۔کرناٹک میں ووٹنگ کا عمل انجام پانے کے بعد مختلف ٹی وی چینلز پر ایگزٹ پول پیش کیے جانے کا سلسلہ شروع ہو گیا ۔ بی جے پی کو سب سے شدید جھٹکا انڈیا ٹوڈے-ایکسس مائی انڈیا کے ایگزٹ پول کو دیکھ کر لگ رہا ہے، کیونکہ اس نے پارٹی کو محض 62 سے 80 سیٹیں ملنے کا امکان ظاہر کیا ہے۔ کانگریس کو انڈیا ٹوڈے۔ایکسس مائی انڈیا نے 122 سے 140 سیٹیں ملنے کی امید ظاہر کی ہے۔تقریباً 10 ایگزٹ پولس میں سے 6 نے کانگریس کو 112 یا اس سے زیادہ سیٹیں حاصل کرتے ہوئے دکھایا ہے، جبکہ ایک (جن کی بات) ایگزٹ پول نے بی جے پی کو اکثریت حاصل کرتے ہوئے ظاہر کیا ہے۔ جن کی بات نے بی جے پی کو 94 سے 117 سیٹیں اور کانگریس کو 91 سے 106 سیٹیں ملنے کی امید ظاہر کی ہے۔
