حیدرآباد ۔ کہا جاتا ہے کہ ہر کڑوی چیز خون کے لیے مفید ثابت ہوتی ہے، اس کی سچائی سے متعلق تو کچھ نہیں کہا جا سکتا مگر ! ہاں، ذائقے میں کڑوی سبزی کریلے صحت پر ضرور مثبت اثرات مرتب کرتی ہے۔ غذائی ماہرین کے مطابق کریلے صحت کے لیے مفید سبزی ہے کیوں کہ یہ ناصرف ہرے رنگ کی ہے بلکہ اس میں اینٹی آکسیڈینٹس، وٹامنز، اور منرلز بھرپور مقدار میں پائے جاتے ہیں۔کریلے کو مختلف غذائیت حاصل کرنے کا بہترین ذریعہ سمجھا جاتا ہے۔ غذائی ماہرین کے مطابق کریلوں کا جوس پینے سے وزن کم اور ذیابطیس کوکنٹرول کرنے میں مدد ملتی ہے، اس میں اینٹی ذیابطیس، اینٹی کینسر، اینٹی سوزش، اینٹی وائرس اور کولیسٹرول کو کم کرنے والی خصوصیات موجود ہوتی ہیں۔ غذائی ماہرین مطابق ایک کپ کریلوں میں 20 کیلوریز، 4 گرام کاربو ہائیڈریٹس اور 2 گرام فائبر پایا جاتا ہے۔ اس کے علاوہ اس میں وٹامن اے، سی، فولیٹ، پوٹاشیم، زنک، اور آئرن بھی پایا جاتا ہے، یہ تمام غذائی اجزا ناصرف مجموعی صحت کو برقرار رکھتے ہیں بلکہ اسے مزید بہتر بھی بناتے ہیں۔کریلوں کے استعمال سے صحت پر حاصل ہونے والے فوائد درج ذیل ہیں:
کریلے کا استعمال کینسر کو روکنے میں مدد دیتا ہے: غذائی ماہرین کے مطابق کریلوں میں ایسے عناصر پائے جاتے ہیں جوکینسر سے بچاؤ میں مددگار ثابت ہو سکتے ہیں۔ ایک ٹسٹ ٹیوب تحقیق کے مطابق کریلوں کے جوس کے استعمال سے معدے، پھیپھڑوں، اور بڑی آنت کے کینسر سے بچاؤ میں مدد ملتی ہے۔ اس کے علاوہ اس کے جوس کے استعمال سے کینسرکی وجہ بننے والے خلیوں کی افزائش میں کمی آتی ہے اور چھاتی کے کینسر کی وجہ بننے والے خلیوں کا خاتمہ ہوتا ہے۔ کریلے کا استعمال بلڈ شوگر لیول کو منظم کرنے میں مدد دیتا ہے۔ طبی ماہرین کے بموجب ہے کہ کریلے کی سبزی کا استعمال شوگرکے مریضوں کے لیے بہترین ہے، صحت مند افراد اگر شوگر کے مرض سے بچنا یا اس سے لاحق افراد اپنی شوگر کو کنٹرول کرنا چاہتے ہیں تو روزانہ ایک کپ کریلے کا پانی (جوس) کا استعمال کریں، کریلے کا پانی بڑھتی ہوئی شوگر کو کم کرنے میں مدد فراہم کرتا ہے۔ اس کے علاوہ یہ جسم میں موجود لبلبے (جو کہ انسولین بناتا ہے) کو بھی فائدہ پہنچاتا ہے۔ ذیابیطس کے مریضوں کو مشورہ دیا جاتا ہے کہ کریلے کا جوس اپنی روزمرہ کی خوراک میں شامل کریں کیونکہ اس کے متعدد فوائد ہیں۔ روزانہ صبح ایک گلاس کریلے کا رس پینا ذیابطیس کے مریضوں کے لیے بہت مفید ہے، یہ سبزی پی پالی پپٹائیڈ سے بھرپور ہوتی ہے جو شوگر کی سطح میں اچانک اضافے کو روک سکتی ہے۔اس کے علاوہ کریلے کا استعمال ضرورت سے زیادہ ہرگز نہ کریں ورنہ یہ خطرناک حد تک شوگر کی مقدار کو کم کردیتا ہے، اس کے استعمال کے ساتھ ساتھ روزانہ کی بنیاد پر شوگر کا ٹسٹ لازمی کریں۔
