نئی دہلی: زراعت اور کسانوں کی بہبود کے وزیر شیوراج سنگھ چوہان نے کہا کہ ایک دہائی پہلے کسانوں کی حالت خراب تھی لیکن اس حکومت کے اقتدار میں آنے کے بعد بہت سے اقدامات کیے گئے جس کی وجہ سے کسانوں کی حالت میں مسلسل بہتری آ رہی ہے ۔ لوک سبھا میں وقفہ سوالات کے دوران ایک ضمنی سوال کا جواب دیتے ہوئے مسٹر چوہان نے آج کہا کہ کسانوں کے فائدے کے لیے پیداوار میں اضافہ، پیداواری لاگت میں کمی، پیداوار کی مناسب قیمت دینا، قدرتی آفات سے ہونے والی اموات کی تلافی وغیرہ سمیت کئی اقدامات کیے گئے ہیں۔ انہوں نے کہا کہ پردھان منتری فصل بیمہ یوجنا کے تحت کسانوں سے 32 ہزار 475 کروڑ روپے کا پریمیم جمع کیا گیا اور اس کے بدلے میں کسان درخواست گزاروں کو 1 لاکھ 72 ہزار 318 کروڑ روپے ادا کیے گئے جو کسانوں سے جمع کیے گئے پریمیم کا پانچ گنا ہے ۔ چوہان نے کہا کہ سابقہ حکومت میں فصل بیمہ اسکیم میں خامیاں تھیں جن کو اب دور کیا گیا ہے۔
انہوں نے کہا کہ اب اس نظام کو تبدیل کر دیا گیا ہے اور اگر انشورنس کمپنی ادائیگی میں تاخیر کرتی ہے تو اسے 12 فیصد سود ادا کرنا پڑے گا۔
مرکزی وزیر زراعت نے کہا کہ پرانی فصل بیمہ ا سکیم کے تحت کلیمز کے تعین کا یونٹ تحصیل تھا۔ اس کا مطلب یہ تھا کہ بیمہ کی رقم صرف اس وقت ملی جب پوری تحصیل میں فصل تباہ ہوگئی۔ ہماری حکومت نے اس میں تبدیلی کی ہے اور گرام پنچایت کو فصل بیمہ اسکیم کا حصہ بنایا ہے ۔ اس کے ذریعے گاؤں کے کسانوں کی فصل تباہ ہونے پر انہیں معاوضہ دیا جاتا ہے ۔ اس میں مقامی تباہی بھی شامل ہے ۔
