سرینگر: قومی کونسل برائے فروغ اردو زبان (این سی پی یو ایل) کے ڈائریکٹر ڈاکٹر شیخ عقیل احمد نے کہا کہ جموں و کشمیر میں عنقریب پیپرماشی سنٹروں کا جال بچھا دیا جائے گا تاکہ نوجوان اردو زبان سیکھنے کے ساتھ ساتھ بر سر روز گار بھی ہوسکیں۔ انہوں نے کہا کہ جموں و کشمیر میں این سی پی یو ایل کی طرف سے چلائے جانے والے کمپیوٹر سنٹروں میں بھی اضافہ کیا جائے گا اور ان سنٹروں کو وزارت اسکل ڈیولپمنٹ نے منظور بھی کیا ہے ۔ انہوں نے کہا کہ مرکزی حکومت جموں وکشمیر کی تعمیر و ترقی کے لئے از حد کوشاں ہے ۔ موصوف ڈائریکٹر نے ان باتوں کا اظہار آج یو این آئی اردو کے ساتھ ٹیلی فون پر انٹرویو کے دوران کیا ہے ۔ انہوں نے کہا کہ این سی پی یو ایل کی طرف سے کشمیر میں پیپر ماشی کے صرف تین سنٹر چل رہے ہیں جو دراصل ہمارے پروجیکٹ کا حصہ نہیں ہیں بلکہ ان کو عارضی بنیادوں پر قائم کیا گیا ہے ۔ عقیل احمد نے کہا کہ این سی پی یو ایل، جو وزارت تعلیم کا ایک ادارہ ہے ، اب مستقل بنیادوں پر جموں وکشمیر میں پیپرماشی سنٹروں کا جال بچھائے گا تاکہ کم پڑھے لکھے نوجوان لڑکے لڑکیاں اردو بھی سیکھ سکیں اور بر سر روز گار بھی ہوسکیں۔ انہوں نے کہا کہ این سی پی یو ایل کے ایگزیکٹو بورڈ کی حال ہی میں مرکزی وزیر تعلیم ڈاکٹر رمیش پوکھریال نشنک کی صدارت میں ایک میٹنگ ہوئی جس میں پیپر ماشی سینٹروں کے قیام کے اس پائلٹ پروجیکٹ کو مستقل پروجیکٹ بنانے کا فیصلہ لیا گیا اور اس طرح اب جموں و کشمیر میں ہر سال پیپرماشی کے نئے سنٹرس قائم ہوں گے ۔
