سری نگر،12 ستمبر(یو این آئی) وادیٔ کشمیر میں جمعے کے روز عید میلاد النبی(ص) کی اختتامی تقریبات نہایت ہی شاندار انداز میں عقیدت و احترام کے ساتھ منائی گئیں۔ اس موقع پر وادی کے چھوٹے بڑے قصبوں میں روح پرور اجتماعات، محافل نعت، درود و سلام اور مجالس ذکر کا اہتمام کیا گیا جن میں علمائے کرام نے سیرتِ رسول اکرمؐکے مختلف پہلوؤں پر روشنی ڈالی اور امت مسلمہ کو اخوت، بھائی چارے اور خدمتِ خلق کی تلقین کی۔ سب سے بڑی اور تاریخی تقریب جھیل ڈل کے کنارے واقع مشہور و معروف آثار شریف درگاہ حضرت بل میں منعقد ہوئی، جہاں وادی کے طول و عرض سے ہزاروں کی تعداد میں عاشقانِ رسولؐ جمع ہوئے ۔ جمعہ کی نماز کے بعد زائرین کو موئے مقدس کے دیدار سے شرف حاصل ہوا، جس کے دوران نعرہ تکبیر و صلوٰۃ کے فلک شگاف نعرے گونجتے رہے اور فضا درود و سلام کی صداؤں سے معطر ہو گئی۔ نامہ نگار کے مطابق درگاہ حضرت بل میں شب خوانی کی خصوصی مجالس کا بھی اہتمام کیا گیا، جن میں نعت خواں حضرات نے عقیدت مندانہ کلام پیش کیا اور سامعین کو اشکبار کر دیا۔
روحانی فضا میں ہزاروں افراد دیر رات تک درود و سلام کی محفلوں میں محو رہے ۔
وادی کے دیگر علاقوں میں بھی عید میلاد النبی کے اختتامی اجتماعات تزک و احتشام کے ساتھ منعقد ہوئے ۔ ان میں جامع مسجد سری نگر، آستان عالیہ چرار شریف، زیارت علمدار کشمیر، آثار شریف کلاش پورہ، پنجورہ اور جناب صاحب صورہ شامل ہیں۔ ان مقامات پر بھی علما و خطبا نے سیرت النبی(ص) کے سنہرے اصولوں کو اجاگر کرتے ہوئے کہا کہ رسول اکرم (ص) کی تعلیمات ہی امن، اخوت اور انسانیت کی بقا کی ضمانت ہیں۔
